Tema ya mehlare ka Bibeleng – Letšatši la 9

Maabane re boletše gannyane ka boleng bja mohlare wa mosedere. Temaneng ya lehono go na le dilo tše tharo tše di lego bohlokwa go ka di ela hloko mabapi le tsela ye mohlare wa mosedere o golago ka yona.

E golela tlase. Mesedere e tsenyeletša medu e megolo e phunyeletšago tlasetlase, e nyaka didiba tše di utolwego le go itatela ka maswika go ka phunyeletša. Go ya ka Numeri 24:6, Israele ka boyona e maatla le go thaba bjalo ka mehlare ya mesedere ye e bapetšego le meetse. Paulose o hlohleleditše Baefeso gore ba dule ba tieletše leratong, le ba agilego godimo ga lona gomme go Bakolose 2:6-7 re bala gore: “Ka ge le amogetše Kriste Jesu gore e be Morena wa lena, le phele le le ba tee le yena. Le dule le tieletše go yena, lena ba ba agilego godimo ga gagwe, gomme le tie tumelong ya lena, ka mo le rutilwego ka gona. Le mo leboge kudu.”

E golela godimo. Mehlare ya mesedere e tsebja ka go fihlelela bogodimo bja go feta dimetara tše 40. Bjalo ka Bakriste re sepela lefaseng, eupša dihlogo tša rena di swanetše go ba ka godimo ga maru, di tsepeletše Kriste. Bjalo ka ge sereti le mongwadi wa dingwalwa wa Amerika J.G. Holland a boletše: “Modimo, re fe batho, ba ba telele, ba mphapahlogo, ba ba phelago ka godimo ga kgodi.”

Mesedere e golela ka ntle. Makala a mohlare wa mosedere a golela ntle ka go rapama gomme a phatlalala ka bophara. Ka go otlologela ntle bjalo ka ge a dira, makala a a aba moriti le bodulo go tšwa go dielelmente. E ka ba maphelo a rena le wona ga a swanela go otlologela ka ntle go kgoma ditlhoko tša batho ba bangwe?