Tema ya mehlare ka Bibeleng – Letšatši la 10

Ge re be re thoma ka molokoloko wo o mo kopana wa melaetša ka mehlare, re lebeletše mohlare wo o hlalošitšwego go Pesalome 1:3, moo Mokriste a bapeditšwego le mohlare wo o bjetšwego moeleng wa meetse. Re boditšwe gore, bjalo ka mohlare, re ka tšweletša dikenywa le gore matlakala a rena a ka se pone. Re ithutile gape gore ka Modimo bjalo ka mošomi wa rena wa serapeng, re tla atlega.

Matšatši a mmalwa a go feta re boletše ka fao, mehleng ya Bibele, ge o be o nyaka go aga selo sa go tšea nako e telele kudu, ge o be a nyaka gore moago o be botse le go ba o maatla, o be o tla šomiša mesedere ya Lebanone.

Gomme ga se phošo gore Pesalome 92 e a lebanya gomme e re Modimo o tla re dira gore re be bjalo ka mesedere ya Lebanone. Mongwadi ga se a kgethe fela mohlare wa gagwe wa mmamoratwa. O kgethile sešupo sa bobotse le maatla; o kgethile mohlare wo o šomišitšwego go agweng ga tempele. Ge Mopesalome a re re tla ba bjalo ka mesedere ya Lebanone, mang le mang yo a kwelego pesalome yeo o be a tseba gore, “Modimo o tlo ntira yo maatla le yo mmotse. Mesedere ke dikokwane tša tempele, gomme Modimo o tlo ntira kokwane mmušong wa gagwe, motho yo a nago le maatla tumelong magareng ga batho ba gabo. Go swana le ka fao mesedere e bego e šomišwa go aga tempele, Modimo o tla aga mmušo wa gagwe a šomiša nna.”