Seswantšho se segolo – Letšatši la 10

Ke mo go kgomago pelo go ba gona moletlong wa go hloma Bibele ye mpsha, kudukudu ge go le la mathomo Bibele e fetolelwa. Bafetolodi, baetapele ba dikereke le setšhaba gantši ba ba karolo ya moletlo. Ka tlwaelo, batho ba ke badumedi bao ba letilego mengwaga e mentši ba letetše phetolelo. Gantši, meletlo ye ya go hloma e sepedišana le go opela, go bina, le go tumiša le go rapela kudu. Ke monyetla wa maleba go ka tšea diswantšho tša go ikgetha.

Ke kopane le Moses Ndala ka 2009 kua Platfontein, kgauswi le Kimberley. E bile nakong ya moletlo wa go hloma Dikgetho tša Mangwalo a Makgethwa tša Mmadi yo Moswa ka leleme la !Xuhn. Moses o be a le kgauswi le go ba le mengwaga ye 70.

Moses o be a apere gabotse, a apaere kefa e šweu. O be a dutše manamelelong, a bala a hlabošitše lentšu go tšwa go Dikgetho tša Mangwalo a Makgethwa tša Mmadi yo Moswa Puku ya B. Ka lekga la pele, o be a bala ka Jesu ka leleme la gabo.

Ka batamela go tšea seswantšho. Lebone la khamera ga le a mo šitiša. O be a tsepeletše go se a bego a se bala. Ge ke batamela go yo bolela le yena, o ile a ntebelela. “Se ke se balago mo ke nnete. Jesu ke Morwa wa Modimo,” a realo.

Moses Ndala o be a swanetše go tšofala pele a ka amogela se sengwe go tšwa ka Bibeleng ka leleme la gabo. Mohlomongwe a ka se amogele Bibele ye e feletšego ka leleme la gabo kgauswinyane.

Seswantšho se segolo seo Moses Ndala a ikhwetšago ka go sona, se anega kanegelo ya manyami ye e hlobaetšago le ya go hwetša katlego ka nageng e šele. Seswantšho se sennyane se ke se tšerego se anega kanegelo ya modumedi yo a ratago leleme la gagwe le Bibele.

Ka nnete go a hlohleletša go kopana le motho wa go swana le ye – motho yo a se nago dihlong tša go bolela ka lerato la gagwe la Bibele, le ge e se ka leleme la gagwe. Se se swanetše se re hlohleletše, bjalo ka badumedi, go hlagiša lerato le le swanago la Bibele ya rena.

A go be bjalo ka ge mopesalome a bolela, “Melao ya gago e ka pelong ya ka.” Ge re bolela se, ka gona anke maphelo a rena a se bontšhe.