Seswantšho se segolo – Letšatši la 18

Word Riders, banamedi ba dithuthuthu ka tlase ga thekgo ya Mokgatlo wa Bibele wa Afrika Borwa, ba etetše Sekolo sa Praemari sa Pabalelo kua Upington pejana lenyaga. Ge banamedi ba 15 ba tsena mabaleng a sekolo, lethabo le be le bonala. Bana ba segile le go bolela ka lethabo le legolo. Ga se letšatši le letšatši moo ba amogelago baeng ba ba sa tlwaelegago.

Barutwana ba Kreiti 7 ba amogetše diBibele tša mahala gomme maloko a Word Riders a boledišane le bona ka kghlego le go ipshina le go boledišana le barutwana. Bana ba lebogile kudu gomme ka lethabo ba boela diphapošing tša bona. Ka bjako, ke tsene ka phapošing ye nngwe ke swere khamera.

Se ke se hlatseditšego se mmakaditše. Go be go na le setu ka phapošing! Bana ba be ba dutše ditafoleng tša bona, ba le gare ba bala diBibele le materiale wa tlaleletšo wo ba o amogetšego, ba kgahlile kudu ke diteng.

Gateetee ka bona seswantšho se segolo. Bana ba ba bohlokwa kudu. Ke karolo ya mmele wa Kriste, mohlomongwe setho se se ikemego, eupša ka moka ke karolo e bohlokwa. Ke lekile go tšea diswantšho, ke lemoga gore nakong e tlago, ka moka ba tla phethagatša tema ya bona bjalo ka karolo ya mmele wa Kriste.

Ge re sepela, maloko a mantši a sehlopha ba boletše gore se se bile le seabe se bohlokwa kudu go bona, ka gobane karolo e tee ya mmele wa Kriste e kgonne go fihlelela le go thuša e nngwe.

Naa bana ba ba bannyane ba tla gopola eng ka kopana ya bona le batho ba ba sa ba tsebego ba go makatša bao ba kopanego le bona? Re ka holofela fela gore ba tla lemoga gore bjalo ka ditho tša mmele wa Kriste, re thušitše ba bangwe ka lerato le tlhompho.

Bjalo ka Bakriste, re ditho tše di ka se aroganywego tša mmele wa Kriste, go sa šetšwe gore re kae le gore re bomang. A re netefatšeng gore se se bonagala ditirong tša rena tša letšatši le letšatši.