Seswantšho se segolo – Letšatši la 19

Kua Bujumbura, Burundi, ke etetše senthara ye e hlokomelago ditšhiwana. Bana ba ke ditšhiwana ka lebaka la HIV/Aids gomme ge o dutše le bona, ba kgwatha pelo ya gago. E sa le bana, ga ba na batswadi. Ba nnoši, e sa le bana maphelong a bona.

Bjalo ka bana, le bona ba nyaka go bolela. Ba bolela leleme la Kirundi gomme mošomedi e be e le toloki. Ba be ba tletše ka mafolofolo gomme ka mehla ba ikemišeditše go tšea seswantšho. Ge ba bona diswantšho le semeetseng sekrining sa khamera, ba be ba taboga ba thabile.

Ke tšere seswantšho sa mošemane yo monnyane. Go bile molaleng gore o be a se na mafolofolo ao bana ba bangwe ba bego ba na le wona. Ke lemogile gore mošemane yo a ka ba a na le HIV. Ka nnete, go bile bjalo. Ke tšere diswantšho ge a amogela kalafo ya gagwe, eupša ka lemoga gore diswantšho tše di ka se gatišwe. Kanegelo ye e ka se anegwe ke ya manyami.

Bjalo ka motswadi, ke kgomegile kudu. Ke lekile go se tšewe ke maikutlo le go leka go tsepelela go hwetša seswantšho sa go ikgetha. Le ge go le bjalo, se se nyakile go se kgonege.

Pesalome 62 e be e le monaganong wa ka ge re šoma. Ke abile molaetša wa temana ye go malapa a mantši ge ba be ba itemogela mathata. Pesalome ye e a kgothatša ka ge e bolela ka tshetledi. Ka moka re hloka tshetledi ge re itemogela mathata bophelong.

Ka lebaka la tlhago ya bophelo, ka moka re hloka sebo le setšhabelo, ka dinako tše dingwe. Re hloka lefelo le tee moo re ka yago ra utama ge moya wo o re dukologilego o tšutla kudu. Re swanetše go kgona go iša manyami a rena, dipelaelo le go se iketle go lefelo leo. Mopesalome o tiiša nnete – Modimo ke Sebo seo. Ke setšhabelo se re se nyakago gomme taletšo e gona ka mehla go ya go yena. Naa re tla e tlogela gore e re fete?