Seswantšho se segolo – Letšatši la 11

Joyela ke tlhaka mmepeng wa Swaziland gomme Matjetjeni Care Point e no ba fela moago wo o nago le tlhaka.

Ke moo mo ke kopanego le batho ba go loka kudu. Ke kopane le basadi go tšwa metseng ya kgauswi bao ba tlago go tlo ruta sehlopha sa bana. Bana ba ga ba tsene dikolo tša mmušo, ka ge ba palela ke go di lefela. Kua Matjetjeni, ba ba nea dijo le go ba ruta go bala le go ngwala – ga go se sengwe ka ntle le se.

Bana ba ba tšwa maemong a bohloki kudu gomme setšhabeng sa gabo bona, “bolwetši bjo boifišago” bo gaketše. Bongiwe Shongwe o nyakile go ba le mengwaga ye senyane, ka sefahlego le go myemyela ka mo go kgahlišago. O be a se na dihlong gomme ka mo tšea diswantšho. O myemyetše kudu gomme a thabela go tšea diswantšho bjalo ka ge ngwana fela a dira. Ge ke be ke mo tšea diswantšho, ke be ke ipotšitša ka bokamoso bja gagwe. Go tla direga eng ka mosetsana yo? Naa o tla fiwa menyetla ka moka ye e mo swanelago? Naa o tla ba le mahlatse a sa tsene ke bolwetši?

Ke bile le monyetla wa go tšea seswantšho se segolo. E bile yo mongwe wa batho ba ba hlokomelago le go ikemišetša go thuša. Batho ba ba ikemišeditše go thuša ba bangwe. Ba bontšha tumelo ya bona ka mediro.

Re a tseba gore lerato la bangwekawena ga le mabapi le potšišo ya gore ke mang mongwekawena. Le mabapi le go bao o ka bago ngwanabo bona. Go na le badumedi ba diketekete ba ba thušago ba bangwe letšatši le letšatši, bjalo ka tabeng ya Joyela. Dithušo tše di direga ka ditsela tše di fapafapanego, eupša go na le morero o tee o swanago. Se ke go obamela molao wo Jesu a re filego wona.

“O rate bangwekawena bjalo ka ge o ithata.”

Mošomo wo o nyaka boikgafo le go lemoga dinyakwa tša ba bangwe. Mošomo wo o nyaka gore nna ke tšwe lefelong la ka la boiketlo gomme ke kgathe tema.