Seswantšho se segolo – Letšatši la 12

Sehlopha sa baotledi ba dithuthuthu ba a kopana gatee mo ngwageng ka tlase ga thekgo ya Mokgatlo wa Bibele. Ba sepela ka dithuthuthu tša bona go ya ditšhabeng tša dinagamagaeng le tše di diilago go yo aba diBibele. Ba bitšwa Word Riders. Nakong ya leeto la bona la pele, sehlopha se se etetše sekolo sa polaseng ka ntlenyana ga Ladysmith kua KwaZulu Natal. Bana kua sekolong sa Praemari sa Umvolu ba tšwa dipolaseng tša kgauswi.

Barutwana ba Kreiti 7 ba hlohleleditšwe go bala diBibele tša bona tša siZulu. Ba hlohleleditšwe gape go tšeela godimo molaetša wo ba o amogetšego go tšwa Bibeleng le go o diriša maphelong a bona letšatši le letšatši. Difahlego tša bona di be di kgoma pelo ge ba theeleditše. Ba kwešišitše bohlokwa bja tiragalo. Ke tšere diswantšho tše ntši. Ge kopano e fela bana ba bala Thapelo ya Morena ka siZulu, bontši bja rena re be re tletše ka megokgo.

Re tšere gape diBibele tša Bana tša siZulu leetong la rena. Yo mongwe wa banamedi o tšere diBibele gomme a di neela bana ba mmalwa ba bannyane, bao ba bego ba letetše bana ba gabobona ba bagolo. Mahlo a bona a be a tletše ka lethabo le tebogo.

Ke tšere seswantšho sa yo mongwe wa banamedi a na le bana ba babedi. O be a gokaretše bana gomme ke bone lerato fela ka mahlong a gagwe. Lerato la Kriste le bonagetše go tiro ye ya kwelobohloko.

Ka nagana ka temana go Mateu 25:40. Bana ba ka nnete e be e le ba “ba nyatšegago”, ke ka lebaka la eng re ka se ba thuše? Lerato la Kriste le a re tutuetša.

Go na le batho ba bantši ba go diila bao ba tshedišwago mahlo setšhabeng. Ka moka ba fapafapane le go ikhwetša maemong a fapafapanego. Go na le batho ba ba se nago se re nago le sona gomme ga ba na mahlatse bjalo ka rena. Batho ba gantši ba sa dumege kudu dilo tša materiale, eupša ba nyaka dijo tša semoya. Naa re ka tlogela monyetla wa go ka thuša badiidi o re feta?