Re bolokegile go Jesu Kriste – Letšatši la 4
Ba Neile Se ba bego Ba ka se Kgona – Karolo ya I
(Di)temana ya Bibele
LUKASE 6
MARKOSE 12
Kabelo ya mohlologadi
DOITERONOMIO 16
Ebangedi e anega kanegelo ya go kgahliša kudu ya mohlologadi yo a neilego ka tšohle tše a bego a na le tšona. O ka e hwetša go Markose 12:41-44 le go Lukase 21:1-4.
Jesu o be a le polokelong ya tempele gomme a bona bahumi ba bantši ba lokela tšhelete ya bona. Gomme, a bona le mohlologadi yo mongwe wa modiitšana a lokela dipapetlana tše pedi tše dinyenyane tša mphiri.
Jesu a kgahlwa kudu ke se a se dirilego. Jesu a bitša barutiwa ba gagwe a re go bona: “Ruri, ke le botša gore mohlologadi yo wa modiitšana o tšhetše tšhelete ye ntši go feta bohle ba ba tšhetšego ka mo polokelong. Gobane ba bangwe ka moka ba tsopotše fela mahumong a bona, eupša mosadi yo wa modiidi yena o tšhetše tšohle tše a bego a na le tšona, tšohle tše a bego a tla phela ka tšona.” Markose 12:43-44
Go ba modiidi ga se lebaka la gore o se neele. Go Doiteronomio 16:16-17, batho ka moka ba laelwa go tla go khunamelwa Morena makga a mararo ka ngwaga lefelong le tee la tirelo. “Yo mongwe le yo mongwe a tliše mpho ka moo a kgonago ka gona go ya ka mo Morena Modimo wa lena a mo šegofaditšego ka gona.”
Nakong ya dinako tše tše boima, ba bantši ba rena ka nnete ba ka bolela gore; ke a hlophega, nka se dire tše ntši. Le ge go le bjalo, seo ga se lebaka la go se dire selo. Mohlolo wa go fa batho ba dikete tše tlhano dijo (Johanese 6:1-14) o kgonne go direga ka lebaka la mošemane yo mongwe, lešabeng leo, yo a neetšego tšohle tše a bego a na le tšona – dinkgwa tše tlhano tša garase le dihlapi tše pedi. O neetše tšohle tše a bego a na le tšona gomme ga go motho yo a ka dirago go feta seo.
