Re bolokegile go Jesu Kriste – Letšatši la 3

Lefaseng ka moka, dibapadi tše ntši di lora ka go kgatha tema go diOlimpiki. Paulose o be a rata go hlaloša bophelo bja Bokriste bjalo ka lebelo gomme keletšo e a e neago Bakriste e swana le keletšo ye bahlahli ba e neago dibapadi tše di itokišetšago lebelo.

Ge o le lebelong, o ka se nagane ka dikatlego tša ka morago goba wa nagana ka go palelwa ga nako e fetilego. O hloka go tsepelela go lebelo le o swanetšego go le kitima. Tšhitišo ya go gadima morago e ka dira gore o lahlegelwe ke lebelo.

Re swanetše go gopola gore Kriste o šetše a re thopetše sefoka. Le ge go le bjalo, gore rena re thope sefoka sa letago le le sa felego, re swanetše re dule re tsepamišitše kgopolo.

Mehleng ya Paulose, bathopasefoka ba mabelo a Segerika, ba be ba amogela mphapahlogo wa matlakala a mohlware gomme ka dinako tše dingwe sefoka sa tšhelete. Mehleng ye, bathopasefoka sa diOlimpiki ba amogela dimetale tša gauta gomme, gantši, difoka tša tšhelete e ntši go tšwa dinageng tša gabobona le bathekgi ba ditšhelete ba ba lefelago gabotse kudu.

Paulose o re gopotša gore ge re kitimme lebelo la rena la Bokriste, le rena gape re tla amogela sefoka, seo e lego letago le le sa felego.

Ka ge bjale le tsošitšwe bahung le Kriste, nyakang tša legodimong, moo Kriste a dutšego madulong a bogoši kgauswi le Modimo. Naganang tša legodimong, e sego tša mo lefaseng, gobane le hwile, gomme bophelo bja lena bo fihlilwe le Kriste go Modimo. Bophelo bja lena ke Kriste, gomme mohla a etla ka borena le lena le tla ba naye le na le letago la gagwe. Bakolose 3:1-4