Re bolokegile go Jesu Kriste – Letšatši la 2

Ke ga kae moo o dutšego ka kerekeng goba o badilego Bibele gomme wa tseba gore molaetša woo e be e le wa gago? Karabo ya gago e bile eng? Temana ya rena lehono e mabapi le karabo ya monna yo mongwe go mantšu a Jesu.

O ka bala kanegelo ka moka go Johanese 4:46-54. Jesu o be a le Kanana gomme mo e ka bago dikilometara tše 40, kua Kapernaume, mošemane, morwa wa mohlankedi wa mošate, o be a hlokafala ka letadi. Tatagwe, morago ga go kwa ka Jesu, o yo go mmona. O phuphuthela Jesu go ya Kapernaume go yo fodiša morwa wa gagwe.

Jesu a re go yena: “Sepela, morwago o tla phela!”

Go ba le tumelo, motho o hloka go lemoga le go ikokobetša go maatla a lentšu la Modimo. Mohlankedi wa mošate o re, “Etla”. Morwa wa mmetli o re, “Sepela.”

Mohlankedi wa mošate o dumela go Jesu gomme ka go obamela o ya gae. Ke tsela e telele go tloga Kanana go ya Kapernaume ka ge a swanetše go sepela bošego ka moka. Letšatši le le latelago, bahlanka ntlong ya gagwe ba kopana le yena le go mmotša ditaba tša lethabo tša gore letadi le fedile gomme morwa wa gagwe o a fola. O ba botšiša gore se se diregile neng gomme ba araba ka gore, “Maabane ka nako ya pele mosegare.” (Johanese 4:52)

Tate o lemoga gore ke ka nako ye Jesu a re go yena, “Sepela, morwago o tla phela!” Bibele o bolela gore mohlankedi le bohle ba lapa la gagwe ba dumela.

Go na le tše ntši tše re ka ithutago tšona go tšwa temaneng mabapi le maatla a lentšu la Modimo, ao a sa lego gona lehono bjalo ka ge a be a le gona nakong yeo. Morena o sa dira mošomo wa gagwe ka maatla a lentšu la gagwe. Modimo o sa bolela le rena lehono ka Bibele.

Morena wa rena Mong wa bohle ga a fetoge. Molaetša wa gagwe o sa swana le lehono bjale ka ge o be o le bjalo mengwaga e 2 000 ya go feta. Gape o sa le kgauswi kudu le go hwetšagala go bohle bao ba yago go yena ge ba nyaka se sengwe, bjalo ka ge a hwetšegetše ge a fodiša mošemane yo a bego a hlokafala bokgole bja dikilometara tše 40.