Re bolokegile go Jesu Kriste – Letšatši la 14

Ge mokapotene yo a hlokafetšego wa sehlopha sa Bosetšhaba sa Khrikhete sa Afrika Borwa, Hansie Cronje, a kgathile tema go rekišeng papadi, o amogetše molato wa gagwe. Lebaka la gagwe la gore diabolose ke yena a mo dirišitšego seo, le nyaditšwe le go solwa ke batho ba bantši.

Sathane o swanetše go ba a thabišitše ke karabo yeo. Ge batho ba bantši ba dumela gore Sathane o a phela le gore o a šoma maphelong a batho, go tla ba kaone go yena go tšwela pela ka ditiro tša gagwe tše mpe, a leka batho gore ba arabele kgahlanong le Modimo.

Bibele e utolla Sathane bjalo ka lenaba le legolo la Modimo le motho. Go Baefeso 2:2, o hlalošwa bjalo ka molaodi wa meoya ye e bušago lefaufaung, e lego yona meoya ye bjale e hlohleletšago ba ba nyatšago Modimo go dira tše mpe.

Ke phošo go hlokomologa go ba gona ga gagwe le go ba phošo e kgolo kudu go nyatša khuetšo le seabe se a ka bago le sona go bao o ba ratago.

Jesu o be a itokišitše gabotse ka kopano ya gagwe le Sathane (Mateu 4:1-11). O be a sa tšo kolobetšwa le go amogelwa ke Tatagwe, ge Moya wo Mokgethwa o mo iša lešokeng moo a itimilego dijo matšatši a 40.

Fao, diabolose a leka Jesu yo a bego a swerwe ke tlala gore a fetoše maswika go ba bogobe, go leka lerato la Modimo go yena gomme mafelelong, a mo tshephiša mebušo ka moka ya lefase le mahumo a yona ge a ka mo khunamela. Bibele e re botša gore morago ga ge Jesu a ganne diabolose, barongwa ba tla ba hlankela Jesu.

Sathane o tla go rena ka maanomabe dinakong tša rena tša tlalelo. A ka re tlogela re gobaditšwe maikutlong le go ba le mabadi, eupša a ka lwantšhwa gabotse. Ka gobane Sathane ke lenaba le le fentšwego. Maatla a gagwe le taolo go badumedi a fedišitšwe sefapanong (Johanese 12:31).

Ge re ikokobetša go Modimo le go lwa le diabolose, a ka se be le maatla a go re kweša bohloko. O tla re tšhaba (Jakobose 4:7).