Re bolokegile go Jesu Kriste – Letšatši la 15

Bophelong, ka moka re itemogela mathata – mathata a re kwešago bohloko gomme ka dinako tše dingwe a ka re pšhatlaganya. E ka ba kotsi e šoro, bolwetši, go felelwa ke mošomo goba go se botegele ke molekani. Dilo tše mpe di direga go batho ka mehla.

Dinakong tše bjalo, go tlwaelegile go retologela go Modimo gomme wa botšiša, “Ke ka lebaka la eng Morena, ke ka lebaka la eng se se direga go nna?”

Josefa a ka ba a botšišitše potšišo e swanago. O be a tlaišwa ke bomorwarragwe, a tšeelwa seaparo sa gagwe, a lahlelwa ka sedibeng le go rekišwa go ba lekgoba go Potifare, molaodi wa baleti ba mošate wa kgoši ya Egepeta. Modimo o be a le kae ge tše ka moka di direga? (Genese 37:23-28)

Josefa o atlegile ka tlase ga mong wa gagwe, eupša mathata a gagwe ne a le kgole le go fela. Le ge a be a se na molato, o pharilwe ka tatofatšo ya maaka ya go leka go kata mosadi wa Potifare gomme, morago ga fao, a lahlelwa kgolegong.

Ke feela ka morago ga mengwaga e mentši, moo Josefa mafelelong a lemogilego gore Modimo o fetošitše bobe bjo ba mo dirilego bjona go ba go loka, gore a phološe maphelo a batho ba bantši (Genese 50:20).

Josefa, Moshe, Jesaya le Hesekiele – Bibele e na le mehlala e mentši ya batho bao ba bilego le mathata a magolo, ao Modimo a a fetošitšego go loka go morero wa gagwe.

O šoma maphelong a rena gape, ka gobane o na le leano le lebotse le morero go rena ka moka. Go ka ba le nako ye re sa kwešišego gore go direga eng go rena, le gore ke ka lebaka la eng. Gomme, go feta le ge e le neng, re hloka go gatela pele, re mo tshepha. Re swanetše re tshephe tsebo ya gore lerato la gagwe le maatla a tla re thuša gomme mafelelong, re tla ba karolo ya letago la gagwe.