Phela ka Lethabo … Lehono – Letšatši la 9

Ka 2001, Goran Ivanisevic go tšwa Croatia, sebapadi sa thenisi sa maemo a 125 lefaseng ka nako yeo, o dirile histori ka go se ye go makgaolakgang fela a Wimbledon ka go ba karolo ya thonamente ntle le go fenya dipapadi tše di mo neago maswanedi a go ya thonamenteng, eupša o fentše Patrick Rafter go disete tše tlhano tše maatla go ba nkgwete e mpsha.

Ka 2012, go diregile gape. Go fihlela ka makgaolakgang a Wimbledon a dihlopha tše pedi tša dibapadi tša banna tša thenisi, batho ba mmalwa ba be ba kwile ka Jonathan Marray le Frederik Nielsen. Baphenkgišani ba bona, Robert Lindstedt le Horia Tecau, bafenyi ba modikologo wa pele thonamenteng, e be e le bommamoratwa go ka thopa sefoka. Ba be ba sa fenya fela dithonamente tše nnyane tše seswai mengwaga e mebedi ya go feta, eupša gape ba lahlegetšwe gatee leetong la bona la go ya thonamenteng ya Wimbledon ya 2012. Se ke ge go bapetšwa go Marray le Nielsen, ka go ba karolo ya thonamente ntle le go fenya dipapadi tšeo di ba neago maswadi a go ya thonamenteng, gape e le thonamente ya pele ye ba e ralokago mmogo. Le ge go le bjalo, Briton le Dane, Marray le Nielsen, gape ba dirile histori ka go fenya papadi go disete tše tlhano go ba dinkgwete tše mpsha.

Ke ka lebaka la eng re e ba le boikwelo bja borutho, bja go se kwešišege dipelong tša rena ge mophenkgišani yo re bego re nagana gore a ka se thope sefoka lebaleng la dipapadi a fihlelela phenyo? Goba ge talente ya motho yo a hlwekišago mekgotha goba yo a kgago dikenywa e hwetšwa gomme ba e ba le monyetla go e hlagiša go lefase? Goba ge motho, go sa šetšwe bogole goba bolwetši bjo bo hweditšego ke ngaka, a kgona, go sa setšwe mathata ka moka, go namela Thaba ya Kilimanjaro, a ruma phadišano ya ditiragalo tše tharo, e lego go rutha, go namela paesekele le go kitima monabo o mo telele goba go hloma rekhoto e mpsha? Naa mohlomongwe go re nea kholofelo gore ditoro tša rena di ka fihlelelwa ge re tšwela pele go tshepha Modimo?

Go Ditiro 10:34 Petrose o re: “Ruri, bjale ke a bona gore Modimo ga a kgetholle motho.”

Modimo o šomišitše Moshe, le ge a be a kgamakgametša, go ntšha Baisraele Egepeta. O šomišitše Rahaba, segwebakathobalo, go kgatha tema e bohlokwa historing ya Israele. O šomišitše Saulo, mmolai le moahloledi wa Bakriste go ngwala karolo e kgolo ya Testamente ye Mpsha morago ga go ba Mokriste. O be o tseba, Modimo a ka le go nyaka go go šomiša le wena! O nyaka fela pelo ye e dumelago.

Ka gona, se gopole gore ga o a swanela, gore Modimo a ka se go šomiše. Se gopole gore ga a tsebe ka ditoro le dikganyogo pelong ya gago – o di beile fao, ga go bjalo? Nyaka go ba le tswalano le yena le go mo tshepha go hlahla dikgato tša gago. O ka ema o maketše ka se Modimo a kago se dira ka wena, ge o mo tshepha. Modimo a go šegofatše.