Phela ka Lethabo … Lehono – Letšatši la 10

[BOKAMORAGO: Modimo o sa dira mehlolo lehono. Mo ke bopaki go tšwa go babadi go bontšha se.]

Mmadi wa 1, Elton: “Mengwaga e mmalwa ya go feta, re maketše go hwetša gore morwa wa rena wa ngwaga o tee, o na le bolwetši bjo bo sa tlwaelegago. Bolwetši bjo bo baka gore disele tša madi tše khubedu di be le sebopego se e sego sa tlhago gomme, bo fedišwa ke lebete. Se se bakile gore disele tša gagwe tša madi tše khubedu di fokotšege mola lebete la gagwe le gola. Re tšwetše pele go phophothela Modimo gore a fodiše mošemane wa rena ka mo go feletšego. Go be go kweša bohloko go mmona a babja kudu. Nakong ye, re rapetše kudu le go itemogela bogona bja Modimo ge a be a re maatlafatša.

Morago ga dikgwedi tše pedi, o ile a tšhelwa madi gomme ge re mo iša gape go ngaka, ba hweditše gore disele tša gagwe tše khubedu di be di le gabotse! Letago ka moka go Modimo ka ge a arabile dithapelo tša rena.”

Mmadi wa 2, Barbara: “Batswadi ba ka ba dula polaseng tikologong ya Bethal. Mesong e mengwe ya Sontaga, monna o kokotile lebating la bona a kgopela tšhelete. Tate o be a sa swara tšhelete, eupša a nea monna dijo. O ile khitšhining gomme ge a boela lebating la ka pele, monna o be a swere sethunya. O tšhošeditše tate le go laela gore a patlame fase ka dimpa. Tate, le ge go le bjalo, a retologa a lebelela monna thwii ka mahlong. Nakong ye, mma o be a bogetše tšohle go tšwa fao a bego a utame gona morago ga mohlare wa morara. A patlame fase a šupilwe ka sethunya, tate o tšwetše pele le go rapelela tšhireletšo ya Modimo. Mohlasedi o lekile go thuntšha makga a mmalwa, eupša gwa se direge selo. Ge a lemoga se se bego se direga, mohlasedi a tšhaba ka poifo.

Batswadi ba nyaka thušo gomme morago ga diiri, mohlasedi o ile a swarwa lešokeng fao a bego a thuntšha maphodisa – ka sebetša sona sela a bego a šupile tate ka sona pejana. Ke leboga Modimo go ba gona ntlong ya bona polaseng letšatši leo, a šireletša tate!”

Mmadi wa 3, Paula: “Mengwaga e mmalwa ya go feta, monna wa ka o ile a se mpotegele ka go ratana le mosadi yo mongwe. Ke kwele bohloko kudu gomme lebakeng le lengwe, ke bile le tšharakano e kgolo ya maikwelo gomme ka ya kliniking. Le ge re sa hlalana, monna wa ka o be a se sa apara palamonwana ya gagwe ya lenyalo. O e beile ka gare ga morusu wa yona kua gae. Makga a mantši, ke be ke nyaka go e tološa gomme ke dire se sengwe ka yona, eupša se sengwe se nthibela go dira bjalo. Go nthabiša kudu ge monna a apara ka boikgantšho palamonwana ya gagwe ya lenyalo.

Morago ga mengwaga ke rapela, ke kgopela Modimo go kgwatha monna wa ka ka tsela ye A bego a nyaka ka gona, monna wa ka o tšere sephetho sa go ya kampeng ya banna. Nka se tsoge ke lebetše Sontaga yeo ge ke boa kerekeng, go bona mmona la pele morago ga go boa kampeng. O be a tletše dikeledi mahlong a gagwe ge a nkgokarela gomme a kgopela palamonwana ya gagwe ya lenyalo. O be a nyaka go e apara gape.

Ke letile mengwaga e mentši, eupša Modimo mafelelong a araba dithapelo tša ka. Monna wa ka o neetše Modimo pelo ya gagwe gomme ka nnete a thoma go phelela yena. Bana ba ka ba na le tate o moswa gomme ke maratong gape. Ge e ba o na le lenyalo le boima, se tlogele go rapelela molekani wa gago. Ka Modimo, selo le ge e ka ba sefe se a kgonega!”

Elton, Barbara le Paula ba nepile. Modimo o sa dira mehlolo lehono. Go Mateu 17:20 Jesu o rile, “Ke ka gobane le hlaela tumelo. Ruri, ke le botša gore ge le ka be le na le tumelo ye e lekanago le thorwana ya mphogo, le be le ka botša thaba ye la re: ‘Tloga mo o ye mola!’ gomme ya ya. Le be le ka se šitwe ke selo.”A re išeng ditlhohlo tša rena go Modimo le go tshepha yena go bontšha maatla a gagwe go rena. Modimo a go šegofatše.