Phela ka Lethabo … Lehono – Letšatši la 8
Phela ka lethabo ... le go ikokobetša go Modimo
(Di)temana ya Bibele
EKSODOSE 20
JOHANESE 14
Barutiwa ba holofetšwa Moya wo Mokgethwa
Pesalome 112
Katlego ya yo a boifago Morena
Akane le Noa: Banna ba ba babedi ba swana ka eng?
Go Joshua 6, Modimo o laetše Joshua le bahlabani ba gagwe go se tšee tše ba di thopilego motseng wa Jeriko ge o fedišwa. Akane, yo mongwe wa bahlabani ba Israele, o tshela taelo ya Modimo, a tšea diaparo tše botse, silibera le gauta, gomme a di epela ka mošašeng wa gagwe. Modimo a befela kudu ka lebaka la se. Nakong ya ntwa e latelago ya Baisraele, banna ba 36 ba bolawa. Joshua le bahlabani ba bangwe ba makala kudu. Naa Modimo ga a holofetša go ba šireletša kgahlanong le lenaba le go ba nea phenyo?
Go Joshua 7, re bala gore Joshua a gagola diaparo tša gagwe le go itahlela fase ka sefahlego pele ga Modimo, a phophothela karabo gore a kwešiše boemo. Modimo a mo araba. Go tshela taelo ya Modimo ke monna o tee go bakile phenyo ya bona. Letšatši le latelago, Akane o hweditšwe a na le molato. Yena le balapa la gagwe ba ile ba tšhungwa, gammogo le dithoto tša bona. Go se theeletše ga gagwe go fedišitše yena le ditlogolo tša gagwe.
Go Genese 6, re bala gore sebe sa ditlogolo tša Adamo le Efa se kwešitše Modimo bohloko kudu, gomme a itshola gore o hlodile motho. Modimo o be a le boemong bja go fediša batho. Gomme,a bona Noa, yo e bego e le monna wa go loka. Noa o be a se na bosodi pele ga gagwe. Modimo a tšea sephetho sa go phološa Noa le balapa la gagwe. O laetše Noa go aga leselawatle gomme ge pula e ena, Noa le ditlogolo tša gagwe ba be ba bolokegile. Go botega ga monna o tee go phološitše lapa la gagwe le go ba nea bophelo bjo bo swa morago ga lefula.
Ka Bibeleng ka moka, bohlokwa bja go theeletša Modimo bo a gatelelwa. Go Eksodose 20:5-6 Modimo o rile: “O se ke wa di obamela goba wa di direla, gobane ke nna Morena Modimo wa gago, Modimo yo a sa kgotlelelego tirelo ya medingwana ya diswantšho. Ke otla ba ba ntlhoilego le ditlogolo tša bona, ka latišiša go fihlela molokong wa boraro le wa bone. Eupša diketekete tša melokob ya bao ba nthatago, ba phethago melao ya ka, ke di direla ka lerato.” Go Johanese 14:15 Jesu o re: “Ge le nthata, le tla phetha melao ya ka.” Gomme go Pesalome 112:1-2 re bala gore: “Go lehlogonolo motho yo a boifago Morena, yo a kgahlwago kudu ke go phetha melao ya gagwe. Ditlogolo tša gagwe e tla ba tše maatla mo lefaseng; e tla ba moloko wo lehlogonolo wa baloki.”
Naa o a lemoga gore go theeletša goba go se theeletše ga gago Modimo go huetša ditlogolo tša gago? Gaešita le ge o le modumedi o nnoši ka gae, o ka ba le nnete ya gore go theeletša ga gago Modimo go tla ba le bohwa bjo bo swarelelago bja ditšhegofatšo go ditlogolo tša gago. Modimo a go šegofatše.
