Phela ka Lethabo … Lehono – Letšatši la 7

[BOKAMORAGO: Morago ga sengwalwa sa ka sa go feta, babadi ba mmalwa ba nkgopetše go ngwala se sengwe mabapi le go lebeletšana le poifo bophelong bja gago bja letšatši le letšatši. Ke abelana ka seswantšho lehono, seo se ka maatlafatšago tumelo ya gago ge poifo e tšhošetša go go fenya.]

Naa e sa le wa bona moanegwa yo mobe filiming ya diswantšho tše di šuthago a pataganya moanegwa yo mongwe le leboto ka dithipa tše di phuleletšago diaparo, disenthimitara tše sego kae go tšwa fase? Nakwana, moanegwa yo a patagantšwego le leboto o aparela ke poifo le go lemoga ka mo go feletšego gore a ka tšhaba gabonolo ka go šikinya matsogo le maoto a gagwe. Se se tla dira gore dithipa di wele fase.

Se ke se lenaba le se dirago maphelong a rena. O šomiša poifo go re pataganya le leboto. Mathomong, re boifa kudu, moo re sa lemogego gore re ka tšhaba ge re itšhikinya re ipofolla. Re dira bjang se? Re ikgopotša (le lenaba) ka yo Modimo e lego yena le ka dikholofetšo tša gagwe maemong a rena. Jesu o dirile se ge Sathane a mo leka lešokeng.

Mo ke mehlala ye o ka e dirišago ya ka fao dikholofetšo tša Modimo e ka bago tšhoša ya rena kgahlanong le lenaba, ge le re hlasela ka dikgopolo tše mpe:

• Poifo ya bolwetši: Go Jesaya 53:5 re bala gore: “Eupša o (Jesu) hlabilwe ka lebaka la dibe tša rena, a otlwa ka lebaka la makgopo a rena. Rena re ile ra boelanywa le Modimo ka go otlwa moo ga gagwe, ra fodišwa ke dintho tša gagwe.”

• Poifo ya go lewa ke bodutu: Go Baheberu 13:5 re bala mantšu a Modimo: “Nka se tsoge ke le tlogetše, ebile nka se tsoge ke le lahlile.”

• Poifo ya gore Modimo a ka se go lebalele go se sengwe se o se dirilego: Go Jesaya 1:18 Modimo o rile: “Le ge le hwibitše perr ka dibe tša lena, le tla šweufala twaa! Le ge le re hwibii, le tla šweufala pšoo!”

  • Poifo ya diphetho tše mpe: Go Jakobose 1:5 re bala gore: “Eupša ge mo gare ga lena go ka ba le yo a hlokago bohlale, a bo kgopele go Modimo, gomme Modimo o tla mo fa bjona, ka gobane yena o fa bohle ka go se timane le ka go se balabale.”

  • Poifo ya bokamoso: Go Jeremia 29:11 re bala gore: “Ke nna fela ke tsebago merero ye ke le reretšego yona, merero ya katlego, e sego ya tahlego, merero ya bokamoso bjo bo holofetšago.”

  • Poifo ya gore o ka se hwetše molekani, o ka se tsoge o bile le ngwana goba lenyalo la gago le tlo fela ka tlhalo: Go Pesalome 37:4 re bala gore: “O ithabiše ka Morena, mme yena o tla go fa tše o di kgopelago.”

  Kgetha go phela ka lethabo lehono, o tshepha Modimo maemong ka moka. Gopola, a ka go fa molekani goba ngwana ka ponyo ya leihlo. A ka tsošološa lenyalo la gago le ge go bonala o ka re o kgauswi le tlhalo. A ka fodiša yo o mo ratago le ge dingaka di rile o tla phela lebaka la kgwedi. Go feta moo, Modimo a ka tloša dithipa ka moka tše di go dikologilego gomme a go thuša go go theošetša fase go tšwa lebotong. Jesu o šetše a fentše lenaba le go le pataganya le leboto, ga a dira bjalo? Modimo a go šegofatše.