Phela ka Lethabo … Lehono – Letšatši la 6
Phela ka lethabo ... tšhireletšong ya Modimoss
(Di)temana ya Bibele
1 PETROSE 5
1 TIMOTHEOSE 1
Pesalome 91
Gantši ke na le go amogela diemeile go tšwa go ba babadi bao ba pakago gore poifo maphelong a bona e a ba golofatša. Poifo ya go tšofala o nnoši, ya go felelwa ke tšhelete pele kgwedi e fela, ya tlhalo goba go hlaselwa ka bahlakudi. Ke eng poifo ya gago lehono?
Mengwaga e mmalwa ya go feta, lapa la Amerika le etetše Serapa sa diphoofolo sa Oregan kua Portland, Amerika, moo ba tšerego bidio ya morwa wa bona. Bidiong yeo e kopana, Jack, mošemane yo monnyane wa dikgwedi tše e ka bago tše 12, o dutše fase le go bapala pele ga galase ya polokego serapeng – gomme a se lemoge Kya, e tee ya ditaugadi ka serapeng, e leka go thuba galase ka morago ga gagwe gore e mo fihlelele. Le ge ka dinako tše dingwe, re bona marofa a Kya, go boima go yena go ka fihlelela Jack. Ka lebaka la eng? Ka gobane galase ya tšhireletšo ke e koto kudu.
Go 1 Petrose 5:8 re bala gore Sathane, lenaba la lena, o phaphaila bjalo ka tau ye e bopago, o nyaka mafelo a go hlasela badumedi. Le tee la mafelo le a tsepelelago go lona ke go tsenya poifo dipelong tša rena. Ge re sa šireletše menagano ya rena le go wela molabeng wa go tsepelela kudu go poifo, re golofatša ke yona. Ge, ka lehlakoreng le lengwe, re swara dikgopolo tša rena le go di tliša ka fase ga taolo ya Kriste, re le gare re bea tshepo ya rena go Modimo, re tla itemogela tumelo ya rena e maatlafatšwa. Ke ka nako yeo moo rena, bjalo ka Jack, re ka phelago re thabile ka tsebo ya gore Modimo o bea galase ya tšhireletšo go re dikologa go tšwa go ditlhaselo tša lenaba.
Go 2 Timotheose 1:7 re bala gore: “Gobane moya wo Modimo a re filego wona ga o re dire gore re boife; o re tlatša maatla le lerato le boitshwaro.” Go Pesalome 91:2-4 re bala gore: “A ka re go yena: ‘Ke wena setšhabelo sa ka le sebo sa ka; o Modimo yo ke mmotilego.’ Gobane ke yena a go phefišago mereo ya barei le malwetši a mašoro. O go šireletša ka diphego tša gagwe; o bolokega ge o hlokometšwe ke yena.”
A re kgopele Modimo lehono go bea kotse ya gagwe go re dikologa le go kgetha go tsepelela go Modimo gomme e se go dipoifo tša rena. Ka tsela ye, o ka phela ka lethabo le khutšo, o tseba gore ga go selo se se kago thuba galase ya tšhireletšo ya Modimo ye e re dikologilego. Modimo a go šegofatše.
