Phela ka Lethabo … Lehono – Letšatši la 2

Wimbledon 2012: Rafael Nadal, sebapadi se maatla sa bobedi thonamenteng ya thenisi kua Wimbledon (ka nako yeo), o fihlile lepatlelong la thenisi go tlo raloka kgahlanong le Lukas Rasol, sebapadi sa 100 maemong a lefaseng. Go be go se na pelaelo gore Nadal o tla thopa sefoka. O be a šetše a le nkgwete ka 2008 le 2010 go makgaolakgang a Wimbledon le go ba nkgwete ya thonamente ya French Open dibeke tše mmalwa pejana ka rekhoto ya go ba nkgwete ga šupa ka tatelano. Se, ge go bapetšwa le Rosol wa mengwaga ye 26, go tšwa Czech, yo a lahlegetšwego makga a mahlano ka tatelano kua Wimbledon ka modikologo wa pele.

Babogedi, bagaši ba maketše kudu, kudukudu Nadal ge Rasol a thopa sefoka diiri ka morago, a romela Nadal gae. Phenyo ye, yeo e bilego le maemo a go ba e tee ya dimakatšo tše kgolo historing ya thonamente (ka nako yeo), e thubile toro ya Rafael ya go ka thopa thonamente ya lesomepedi ya Grand Slam.

Na e sa le wa ikhwetša boemong bjo swanago bja go makatša le manyami moo o itsholago? Moshe o bile fao. Pefelo ya gagwe e dirile gore a tlogele go ba kgošana ya Egepeta mošate go ba sekebekwa se se tšhabišago bophelo bja sona, ka letšatši le tee. Jona o bile le boitemogelo bjo swanago. Ka lebaka la go se theeletše ga gagwe Modimo, o fetogile go moprofeta yo a bego a na le morero, go ba monna yo a lego ka gare ga mpa ya hlapi e kgolo. Dafida le yena o itemogetše seo. Ka letšatši le tee, o fetogile go go monna yo a kgahlago Modimo go ba mmolai le go dira bootswa.

O swaragana bjang le maemo a manyami? O boela morago go Modimo bjalo ka ge Moshe, Jona le Dafida ba dirile? O ipolela sebe sa gago le go šikara boikarabelo bja dikgetho tša gago tše fošagetšego, o tshepha Modimo go lokiša dilo gore di be gabotse bophelong bja gago?

Go Pesalome 62:8 Mopesalome o ngwala gore: “Mo tshepheng ka mehla, lena setšhaba; mo aleleng mathata ohle a lena; ke yena setšhabelo sa rena.” Gomme go Baroma 8:28 re bala gore: “Gape re tseba ge go ba ba ratago Modimo dilo ka moka di šomela go ba hola, bona bao a ba biditšego go ya ka mo a bego a ikemišeditše ka gona.”

Rafael Nadal ga se a tlogela go raloka thenisi morago ga manyami a gagwe a Wimbledon. Le wena ga o a swanela go felelwa ke kholofelo ya bokamoso bjo bokaone morago ga manyami. Gopola, Modimo a ka šomiša boemo le ge e le bofe bjo boima, bja go makatša go go batametša kgauswi le yena le go bontšha maatla a gagwe go wena. A ka a šomiša le go go lokišetša go, mohlomongwe, katlego e kgolo go bokamoso bja gago. Naa o tla mo tshepha go dira seo? Modimo a go šegofatše.