Phela ka Lethabo … Lehono – Letšatši la 20

[BOKAMORAGO: Modimo o sa dira mehlolo lehono. Mo ke bopaki go tšwa go babadi ba bararo.]

Mmadi wa 1, Louise: “Ka Ngwatobošego 2011, ke nyakile go ipolaya. Ke be ke otlela go tšwa Witbank go ya Bedfordview. Lenyalo la ka le be le na le mathata gomme ke be ke lapišitšwe ke tšhohle le bohle. Ke na le bana ba bane. Ka nako yeo, morwedi wa ka o be a na le mengwaga ye 17, morwa wa ka a na le 12 gomme mafahla a rena a a swanago a na le mengwaga ye mebedi.

Mmileng, ke tsebile gore ke swanetše go ipolaya le semeetseng. Ka tlemolla lepanta la ka gomme ka thoma go otlela ka lebelo. La mafelelo ge ke lebelela lebelo le koloi e bego e kitima ka lona e be e le 210 km/h. Ke be ke nyaka go thula lori e kgolo go tšwa ka morago. Ka tsela ye, ke be nka se bolaye mootledi yo mongwe. Go se kgale, ka bona lori mmileng. Ke okeditše lebelo gomme ka otlela ke lebile lori thwii. Pele ke thula lori, ke bone difahlego tša mafahla a ka pele ga ka. Ka swaya leotwana la go otlela gomme ka se thule lori, ka e efoga mo e ka bago ka dimilimitara.

Dikilometara tše mmalwa ka morago, go be go na le lori ye nngwe ye e emego kgauswi le mmila. Gape, ka oketša lebelo. Nakong ye, pele ke thula lori, ke badile mantšu a magolo a pinki ka morago ga lori: “Re otlelela Jesu”. Gape ka swaya leotwana la koloi, ka se thule lori. Ke eme kgauswi le mmila; ka lemoga gore Modimo o mphološitše ka mogau wa gagwe.

Lehono, go boima go nna go nagana gore bana ba ka ba ka ba ba gotše ka ntle le nna. Ke leboga Modimo gore ga a ntlogela goba go ntahla. Go yena, ka mehla go na le kholofelo – go sa šetšwe gore o ikwa o hloka kholofelo bjang lehono!”

Mmadi wa 2, Ludrick: “Morwedi wa ka, Thearine, o amegile kotsing e kgolo ya koloi. O bile le dikgobalo tše šoro hlogong le ka gare go yena, gomme ge ngaka a bolela le rena la pele, ke bone gore o be a se na kholofelo ya gore o tla phela. Le ge go le bjalo, nna le mosadi wa ka ra se kgaotše go rapelela phodišo ya gagwe.

Dingaka tša monagano kau Medi-Clinic, Bloemfontein, di be di rekile sedirišwa sa go šetša bjoko pejana mo ngwageng. Ka sedirišwa se, ba be ba lekanyetša maemo a kgatelelo, a themperetšha le a moya wa go hlweka a molwetši yo a gobetšego bjokong. Thearine e bile wa pele go diriša sedirišwa.

Ka letšatši la bohlano morago ga kotsi, boemo bja Thearine bja mpefala. Ngaka e re biditše gomme ya re botša gore re mo rapelele, go netefatša gore o lefelong la maleba ge a hlokafala. Karabo ya ka e bile gore Modimo ga a mo tliša bokgole bjo, gore a hlokafale. Re dutše gape ka thoko ga mpete wa gagwe gomme ra rapelela mohlolo. Ka iri ya lesomo bošego, boemo bja gagwe bja kaonafala.

Letšatši le le latelago ngaka ya re ge sedirišwa se be se sa mo šetša, metšhene ya gagwe e ka ba e timilwe, ka ge dipalo go sedirišwa di be di le godimo ga lesome go feta ka mo di swanetšego go ba ka gona.

Modimo o kgwathile morwedi wa rena gomme a mo fodiša. Lehono, o a sepela (le ge e le ka dikokotlelo) gomme bjoko bja gagwe bo šoma gabotse kudu. Re tumiša Modimo yo a phelago yoo go yena tšohle di kgonegago!”

Mmadi wa 3, Marina: “Nakong ya go feta, monna wa ka, sesi le nna re ile Pringle Bay bakeng sa mafelo a beke. Mesong ya Mokibelo, re tšere sephetho sa go yo rutha ka lewatleng. Gateetee, re lemogile gore re mathateng ge lephoto le maatla le thoma go re goga go tšwa lebopong. Ke ile ka tšhoga ka ge lephotho le dirile gore ke lape gomme ka thoma go metša meetse. Monna wa ka o ruthile go ya lebopong go yo hwetša thušo gomme a re goeletša gore re se tšhoge, re furalele lewatle re dule re phaphametše.

Ge ke furalela lewatle, ke lebeletše legodimong gomme ka kgopela Modimo go romela motho go tla go re phološa. Ke be ke lapile kudu. Gateetee, banna ba babedi ba tlile ba kitima go tšwa lebopong gomme ba re phološa. Le ge ke sa tseba maina a bona, ke a tseba gore Modimo o ba šomišitše go re thuša. Ka morago re kwele gore go na le motho yo a nweletšego letšatši leo gomme ra lemoga gore dilo di ka be di fapane kudu go rena.

Ke tumiša Morena, Mophološi wa rena, ka se a se dirilego. Ke lemoga gore o re phološitše gore re kgone go bolela ka bogolo bja gagwe le lerato go bana ba gagwe. Mo tumiše!”

Babadi ba ba bararo ba nepile. Modimo o kgauswi kudu le rena ka gare ga maemo a a hlohlago kudu a maphelo a rena. Go Doiteronomio 31:8 re bala gore: “Morena ka boyena o tla go eta pele mme a ba le wena. A ka se go lahle goba a go tlogela, ka gona o se ke wa boifa goba wa nolega moko.” Gomme go Doiteronomio 33:27: “Modimo ka mehla e bile Mošireletši wa lena; matsogo a gagwe a neng le neng ke boitshwarelelo bja lena.” Mo laletše go ba karolo ya bophelo bja gago letšatši le letšatši. Gomme o tsebe ka nnete, ga a potume goba go robala gomme ka mehla o tla thuša ge re goeletša go yena. Modimo a go šegofatše.