Phela ka Lethabo … Lehono – Letšatši la 1

Go na le mehuta ye meraro ya batho: “motho wa maabane”, “motho wa gosasa” le “motho wa lehono”.

Motho wa maabane ke yo a sa naganago tša nakong e fetilego. Motho yo bjalo ka mehla o tla bolela ka fao dilo di bego di lokile nakong e fetilego (le ge e ka ba boiphoro). Batho ba bjalo ba katana le go lebalela, ka ge ba ka se goba go se beele ka thoko dilo tše mpe tše ba dirilwego tšona nakong e fetilego, gore ba gatele pele go bokamoso bjo bokaone. Kotsi ya go ba motho wa maabane ke gore o ka tsoga mesong e mengwe wa lemoga gore bophelo bja gago bo go fetile le gore o lahlegetšwe ke nako e botse le bao o ba ratago, ka lebaka la pefelo le go se lebalele bophelong bja gago.

Motho wa gosasa ke yo a tsepeletšego kudu go bokamoso. Motho yo bjalo o katana le go kgotsofatša ke se a lego sona le se a nago le sona. Ka mehla o katanela tše ntši le tše kaone, ka tumelo ya maaka ya gore katlego e swana le lethabo le legolo. Nkwišiše gabotse, ke gabotse go ba le ditebanyo le go latela ditoro tša gago, eupša ge go ama ditswalano tša gago le bao o ba ratago ka tsela e mpe, o tseleng e fošagetšego. Kotsi ya go ba motho wa bokamoso ke gore o ka tsoga mesong e mengwe phapoši ya gago ya go ithuta e tletše ka difoka le ditifikeiti gomme go se na yo o ka di abelanago le yena. Bophelo bja gago bo tla be bo go fetile, eupša o paletše ke go šomiša dinakwana tša go ikgetha tše di bilego gona le bao o ba ratago.

E re ke bolele ka motho wa lehono. Motho yo o lemoga manyami a gagwe le diphošo tša nakong e fetilego, eupša ga a dumele gore di mo laole. Motho wa lehono gape o ba le ditebanyo tše hlakilego tša bokamoso, eupša ga a dumele gore di tšee nako ya gagwe ka moka. Ga a lahlegelwe ke menyetla ya bjale go dira phapano bophelong bja motho yo mongwe. Motho wa lehono o lemoga mošomi-gotee yo a nyamilego ofising ya gagwe, motho yo a kgopelago mokgotheng, lephodisa le le neilego tirelo e botse, motšofadi yo a hlokago thušo go tshela mokgotha wa leema-ema goba ngwana yo a nyakago go gokarwa – le go kgetha go reta goba go ba motho yo a phethagatšago dinyakwa tšeo. Motho wa lehono o kgetha go phela ka lethabo lehono ka gobane o lemoga gore lehono le a feta, a ka se le hwetše morago.

Go Bafilipi 3:13-14 Paulose o ngwala gore, “… se ke se dirago ke gore tša ka morago ga ka ke a di lebala, ka obelela tša ka pele ga ka. Ke šianela go ba thwadi gore ke yo thopa sefoka, e lego go biletšwa ke Modimo bophelong bja legodimong ka Kriste Jesu.”

A re ithuteng go tša nakong e fetilego gomme re rulaganye, eupša re kgethe go phela ka lethabo lehono mola re le gare re butše mahlo gore re se lahlegelwe ke menyetla go kaonafatša bophelo bja motho yo mongwe, ka go ba gona go fihlelela dinyakwa tša bona. Modimo a go šegofatše.