Phela ka Lethabo … Lehono – Letšatši la 11

[BOKAMORAGO: Mo ke setsopolwa go tšwa go emeile ya mmadi ye ke e amogetšego: “Benescke, go monate go kwa ka dithapelo tše di arabilwego. Monna wa ka, le ge go le bjalo, e bile setagwa le go lwala mengwaga ye 8 pele a hlokafala. Ke rapeletše phodišo ya gagwe kudu ka gobane ke be ke sa nyake go godiša bana ba rena ba babedi ka ntle le tate. Ke ka lebaka la eng Modimo a sa araba thapelo ya ka?”]

Kgwekgwe ya potšišo (ye ke e amogelago gantši go tšwa go babadi), ke: Ke ka lebaka la eng Modimo yo a lokilego a dumelela dilo tše mpe go direga go batho ba ba lokilego? Re ka oketša gape: Ke ka labaka la eng go na le dikotsi tše ntši tša tlhago? Ke ka lebaka la eng Modimo a sa thibele babolai goba bagoboši ba bana go senya maphelo? Goba ke ka lebaka la eng go na le badiidi ba bantši bao ba dulago mekgotheng?

Dipotšišo tše ke tše ntši gomme ga go dikarabo tše bonolo go tšona. Re hloka go gopola gore ntwa ya rena ya letšatši le letšatši ga se ya go lwa le batho ba nama, ke ya go lwa le meoya ye mebe ya lefaufaung, e lego magoši a semoya, le balaodi ba semoya, le babuši ba lefase le lebe le (Baefeso 6:12). Leano la lenaba ke go re gobatša le go leka go re kgodiša gore ke Modimo yo a dirilego seo, gore re sole Yena. Nnete ke gore, Modimo o a kwešiša le go re bea kguswi le pelo ya gagwe nakong ya ledimo le ge e ka ba lefe maphelong a rena – le gaešita go sa bonale bjalo. Re swanetše go tshepha yena le go tseba gore o laola maphelo a rena, gomme a ka šomiša boemo le ge e le bofe go re batametša kgauswi le yena, ge re mo dumelela go dira seo.

Go Jesaya 55:8-9 Modimo o re: “Megopolo ya ka ga e swane le ya lena, le ditsela tša ka di fapana le tša lena. Bjalo ka ge magodimo a phagame kudu ka godimo ga lefase, ka wona mokgwa woo ditsela le megopolo ya ka di ka godimo ga tša lena.” Go 2 Bakorinte 12:8-9, Paulose o ngwala gore o rapetše Modimo gararo gore a mo hlomole phatša nameng ya gagwe. Phetolo ya Modimo e bile, “Kgaugelo ya ka e go lekane, gobane maatla a ka a tiile kudu mo go ba ba fokolago.”

Kgaugelo ya Modimo e tla re maatlafatša le go re rwala ka gare ga ledimo le lengwe le le lengwe maphelong a rena. Ga gona taba gore o ka gare ga lenyalo le boima, o lahlegetšwe ke tšhelete e ntši, molekani wa gago o a babja kua gae, o katana le go tlogela temalelo, o na le tlhohlo lefelong la mošomo goba bjalo ka ge mmadi wa ka godimo a boletše, o dutše ka pelo e robegilego le go ba le dipotšišo tše ntši. O ka tseba gore Modimo o tla go fa tekanyo ya kgaugelo le maatla a o a hlokago go lebeletšana le boemo bjoo. O holofeditše gore a ka se dumelele selo le ge e le sefe go direga go wena se o ka se kgonego go emelana le sona, ga a holofetša bjalo?

Ka dinako tše dingwe, re hloka go beela ka thoko dipotšišo tša rena gomme re tsepelele go Modimo. O laola dilo ka moka. Kgauegelo ya gagwe e lekane. O dira gore dilo ka moka di šomele go hola maphelong a ba ba mo tshephago. Ke ka lebaka la eng o sa kgethe go tshepha yena go tše kaonekaone bophelong bja gago? Modimo a go šegofatše.