Nako e bohlokwa – Letšatši la 6

Jesu o tšere sephetho sa gore ke nako ya maleba ya go ka boledišana ka mo go tseneletšego le barutiwa ba gagwe. Ka gona a ya le bona Kesarea-Filipi moo ba bilego le poledišano ya go ntšhetšana sa mafahleng.

Na barutiwa ba be ba lemoga se se diregago? Batho ba be ba nagana gore Jesu ke mang? Bona (barutiwa) babe ba nagana gore ke mang? Tše ke dipotšišo tše Jesu a di botšišitšego barutiwa ba gagwe. Petrose o bolela legatong la sehlopha: “O Mesia, Morwa wa Modimo yo a Phelago.”

Jesu o kgahlwa ke karabo gomme o šegofatša Petrose. Barutiwa ba be ba dumela (bjalo ka ge Bajuda ba dumela) gore ge Mesia a etla lefaseng, o tla hloma mmušo wo o holofeditšwego ka tsela ya ponagalo gomme setšhaba se tla buša go ya go ile.

Ka gona, Jesu o hlalošetša barutiwa gore mmušo wo o holofeditšwego o tla hlongwa eupša ka go tlontlollwa ga gagwe le lehu la gagwe. Lega go le bjalo, ka letšatši la boraro, o tla tsoga bahung.

Barutiwa ba makatšwa ke dikutollo tše. Petrose o biletša Jesu thoko gomme o thoma go mo kgala. Nagana! Jesu o retologela go Petrose gomme a re: “Sathane, tloga ka morago ga ka! O a nkgopiša, ka gobane ga o nagane tša Modimo, o nagana tša batho” (Mateu 16:23).

Petrose o be a sa letela go tloga go mogale go ya go nnoto ka go tshwenyega ga gagwe ka Jesu. Eupša Jesu o be a botša barutiwa ba gagwe mabapi le se bophelo bja tumelo bo lego sona. Ga se go namela terene eupša go phela bophela bja go itima dilo le go lebeletšana le mathata ka lebaka la gagwe. “Tšea sefapano sa gago o ntatele,” ke taletšo go tšwa go Jesu.

Na o ikemišeditše go e amogela? Ke tsela e le tee fela go bophelo bjo bo sa felego mmušong wa gagwe.