Nako e bohlokwa – Letšatši la 5

British and Foreign Bible Society o hlomilwe kua London ka 7 Mopitlo 1804. Mokgatlo wo e be e le mokgatlo o mogolo wa Mekgatlo e mengwe e mentši ya Bibele go akaretšwa Mokgatlo wa Bibele wa Afrika Borwa.

Sephetho sa go fediša tlhoko e kgolo ya diBibele ka go hloma mokgatlo se hlohleleditšwe ke tumo le phegelelo ya Mary Jones, moswa wa go diila yo a bego a ikemišeditše go hwetša Bibele ka leleme la gagwe. Morago ga go kgoboketša tšhelete ka go dira mešomo ya nakwana mengwaga, o ile a sepela mo e ka bago dikilometara tše 40 tikologong ye e omilego ya Weles go ya torotswaneng ya kgauswi go yo reka Bibele go moruti wa tikologo yeo.

Kopanong kua London moruti yoo o šomišitše mohlala wa gagwe go kgopelela Wales diBibele. Moruti-gotee a dumela, a re: “Ge re direla Wales, ke ka lebaka la eng re sa direle mmušo ka moka, ke ka lebaka le eng re sa direle lefase ka moka?”

Mošomo wa Mokgatlo wa Bibele ga o a thoma ka 1804. Ke wa kgale kudu go feta fao. Ge Moshe a theoga Thaba ya Sinai, a swere Melao ye Lesome ye a bego a tlo e botša bana ba Modimo, seo e bile mathomomayo a se Mokgatlo wa Bibele o se dirago lehono.

Bibele ye e feletšego ga bjale e gona ka maleme a 694, gomme diTestamente tše Mpsha le Dikarolo ka maleme a mangwe a 2 701. Eupša ka maleme a go feta 7 359 lefaseng go sa na le mošomo o montši wo o swanetšego go dirwa.

Selo se sebotse ka mošomo wa Mokgatlo wa Bibele ke gore Bakriste ka moka ba mengwaga ka moka ba ka kgatha tema. Ba ka kgatha tema e bohlokwa go diprotšeke tša phetolelo, tšweletšo le kabo bobedi ka Afrika Borwa le lefaseng ka bophara.

Mohlomongwe Modimo o a go bitša go bolela ditaba tše botse tša ebangedi ka tsela ye.