Nako e bohlokwa – Letšatši la 4

Ge o phetše nakong ya ge go tumiša tempeleng kua Jerusalema go be go le molaong, o tla tseba temana ye gabotse. Ka gobane ke karolo ya sefela sa go leboga le go tumiša Modimo.

Gatee ka ngwaga batho ba be ba bokana ka molokoloko ka ntle ga tempele go keteka Monyanya wa Mešaša wo o swanago le Lamorena la Puno wo o ketekwago dikerekeng tše dingwe tša Bakriste lehono. Nakong ya monyanya wo bana ba Modimo ba laelwa go thabela kabo ya tšhegofatšo ya Modimo le tlhokomelo. Go bonwa go le bohlokwa kudu go ka thuša ba bangwe ka nako ye.

Gantši menagano ya rena e tletše ka dilo tše re di nyakago. Go lenaneo le le tletšego la ditiro tša letšatši le letšatši, go bonolo kudu go bea Modimo tlase go lenaneo la rena la dilo tše di tlago pele maphelong a rena. Re hloka go gopola gore letšatši le lengwe le le lengwe ge re tsoga ke mpho go tšwa go Modimo. Morena Modimo Ramaatlohle yo a hlodilego legodimo le lefase le go re bopa ka seswantšho sa gagwe o dirile letšatši le. Ke Modimo yo maatla wa go loka.

Go tšwa go moloko go ya go o mongwe, o bitša bana ba gagwe go mo hlankela le go mo tumiša. Ye bjale ke nako ya rena gomme nnete yeo e swanetše go re tlatša ka lethabo. Go sena se sebotse se re se dirilego o a re rata gomme o re beile lefaseng ka morero le nako – eupša e se go ya go ile! Ka lebaka leo, dikgopolo tša rena letšatši le letšatši di swanetše go hlagiša tebogo ya rena e kgolo le go tumiša Modimo yo a re ratago kudukudu.