Na o a leboga? – Letšatši la 5

Mengwaga e mmalwa ya go feta, pele ga Paseka, re nyakile go bontšha lerato la Jesu ka tsela ye e bonagalago go malapa a Nkasehlakahlaka sa Kapa. Ka Protšeke ya rena ya Oasis kua Radio Tygerberg 104fm, batheeletši ba be ba kgetha malapa ao a hlokago ka tsela ya go romela molaetša ka SMS ka studiong. Gomme ra kgetha malapa a mahlano le go ba makatša, nakong ya lenaneo la mosong, malapeng a bona ka diboutšhara tša dijo le diaparo.

Le tee la malapa le kgethilwe ke Simoné Solomons go tšwa Blue Downs. Mo ke setsopolwa go tšwa go SMS ya gagwe: “Ke morutwana wa marematlou gomme ke rata go kgetha lapa la gešo. Re ka gare ga boemo bjo boima ga bjale. Ka dinako tše dingwe ga rena dijo tše re ka di jago. Lega go le bjalo mma wa ka, Dianne, o dula a na le kholofelo. Gape ke moithaopi sekolong se sengwe sa mo motseng, moo a thušago go apeela bana ba ba hlokago dijo. Go a nnyamiša go bona mahlo a a tletšego dikeledi a mma ge a emelela lebatong morago ga go rapela. Buti wa ka o monnyane o botšiša gantši gore Morena o tlo re fa katlego neng. Mma wa ka ka mehla o araba ka gore: ‘Nako ya Modimo ke nako ya maleba. Ke dumela gore katlego e tla tla e se kgale …’ ”

Ge re fihla ntlong ya Solomon kua Blue Downs, Dianne, mmago Simoné, o be a maketše kudu. Pele re ka bolela gore re tletše eng, ke be ke kgona go kwa tumelo le tebogo ya gagwe. Mosadi yo o be a leboga ka tšohle tše a nago le tšona – le ge e be e le tše nnyane.

Ge ba ekwa ditaba tša gore ba tlo amogela boutšhara ya dijo le diaparo, ka moka ba lla. Go be go le molaleng gore e tlo tliša kimollo e kgolo. Dianne o re lobogile a lla, eupša sammaletee, a hlohleletša batho ba ba lego ka gare ga mathata go ka tshepha Modimo. Gomme gwa latela semaka sa bobedi: ra tsebatša gore Simoné ke mofenyi wa Protšeke ya Moletlo wa rena wa Marematlou wa ngwaga le ngwaga. Ke protšeke ye re hlakanelago le bathekgi gore ba kgone go re abela tšohle tše di hlokegago tša taelano ya marematlou e botsebotse, ya barutwana ba bararo ba marematlou kua Nkasehlakahlakeng sa Kapa. Go bile le dikeledi gape.

Se re bego re sa se tsebe ke gore Dianne, beke pele ga ketelo ya rena, o ile mafelong a go fapanafapana go yo dira kgopelo ya kadimo. O be a nyaka go šomiša tšhelete gore ba rokele Simoné roko ya taelano ya marematlou. Lega go le bjalo, kgopelo ya se atlege. Ge a fihla gae, a tsena ka phapošing ya go hlapela, a tswalela lebati, gomme a lla pele ga Modimo. O be a se na leano la bobedi. Ge a etšwa ka phapošing ya go hlapela, Simoné o tlile go yena a re: “O a tseba, mma, mohlomongwe Modimo ga a nyake re dira kgopelo ya kadimo. Mohlomongwe o tla re abela.” Re be re sa tsebe, eupša Modimo a bona tumelo ya gagwe gomme a e putsa.

Go Bakolose 4:2 re bala gore: “Phafogelang go rapela le kgothetše le leboga Modimo.” Gomme go Pesalome 50:14: “Ditebogo a e be sona sehlabelo sa gago …”

Re nea neng sehlabelo? Ge go le bohloko kudu. Re nea bjang “sehlabelo sa tebogo”? Re swanetše go leboga Modimo ge go le boima go dira bjalo gomme go sa šetšwe maemo a rena, ka tsebo ya gore a ka fetoša boemo. BagaSolomon ba dirile seo. Ba fentše teko gomme Modimo a putsa tumelo ya bona. Ke katlego efe ye o e letetšego? A re tšwele pele go rapela re kgothetše re le gare re leboga le go tliša dihlabelo tša tebogo. Modimo a ka, bjalo ka ge a dirile ka bagaSolomon, dira gore o hwetše katlego ya gago. Modimo a go šegofatše.