Na o a leboga? – Letšatši la 6

Na e sa le wa leboga ka lebaka la lemati le le tswaletšwego bophelong bja gago? Go ba gona, ga go motho yo a lebogago ka kgopelo ya mošomo ye e sa atlegago, bohloko le go lahlwa morago ga go kgaogana goba ge kwano ya go reka se o bego o nagana gore e tla ba legae la gago la ditoro e sa atlege. Lega go le bjalo, o leboga goba go sola Modimo ka lebaka la “mabati a a tswaletšwego” ka gare ga manyami a gago?

Nakong ya mengwaga e mmalwa ya go feta, baetapele ba go fapanafapana ba boletše ka bopaki bja tebogo ya bona mabapi le kabelo ya Modimo, tšhireletšo le bokgoni bja go ba homotša nakong ya bona e boima. Ge ke be ke bala diemeile tše, ka lemoga gore ke makga a makae ao “lemati le le tswaletšwego” le bego le nyakega gore motho a itemogele bogona bja Modimo le maatla ka tsela e mpsha. Modimo o tseba tša nako e e tlago gomme ka lebaka la se, re ka ba le nnete ya gore ge re itemogela mabati a a tswaletšwego ga bjale, Modimo mohlomongwe o gare o bopa goba go hlama semelo sa gago, goba o gare o re šireletša go kgetho e fošagetšego, ka gobane o na le selo se segolo gape se sekaone sa nako e e tlago.

Go Jeremia 29:11 Modimo o re: “Ke nna fela ke tsebago merero ye ke le reretšego yona, merero ya katlego, e sego ya tahlego, merero ya bokamoso bjo bo holofetšago.” Go Baroma 8:28 re bala gore: “Gape re tseba ge go ba ba ratago Modimo dilo ka moka di šomela go ba hola, bona bao a ba biditšego go ya ka mo a bego a ikemišeditše ka gona.” Gomme go Jesaya 22, Modimo o bitša Elyakima go mo hlankela gomme o bolela se ka yena go temana ya 22: “Ke tla mo dira yo a hlatlamago kgoši, setlogolo sa Dafida, ka maemo. Ke yena a tlago dumelela motho go tsena mošate goba a mo ganetša.” Modimo a ka nea maatla a ka gobane taolo ye ke ya gagwe.

Mohlomongwe ke swanetše ke go botšiše gape: Na o leboga goba go sola Modimo ka lebaka la mabati a a tswaletšwego bophelong bja gago? Mohlomongwe o tla leboga Modimo ka kgopelo ya mošomo yeo e sa atlegago, ka ge e go kgontšhitše go hwetša mošomo o mokaone dikgwedi tše mmalwa morago (wo o ka bego o sa o hwetša ge o ka be o hweditše mošomo wa pele). Kgaogano e bohloko e ka be e le se se bego se nyakega gore wena o kopane le moratiwa wa gago wa nnete le molekani wa nako e e tlago. Gomme kontraka ya go reka ye e sa atlegago mohlomongwe e ka ba e bile tšhireletšo e kgolo le tšhegofatšo go tšwa go Modimo bjale ka ge o na le ntlo e kaone lehono.

A re lebogeng ka boomo mabati a a tswaletšwego maphelong a rena – le ge re sa kwešiše mathomong. Dibekeng tše mmalwa, dikgwedi goba mengwaga, re ka kwešiša tšhegofatšo ye a bego a e swere. Modimo a go šegofatše.