Na o a leboga? – Letšatši la 19

Go na le setu ka phapošing ye badumedi ba bokanego go yona gomme ba tswaletše mabati. Barutiwa ba a boifa gape ba tshwenyegile ka bokamoso bja bona. Na le bona ba tla hlomarwa ka gobane ba bonwe ba na le Jesu? Na ba tla bolawa ka lebaka la tumelo ya bona? Le ge go se na yo a bolelago ka yona, ka moka ba nagana ka mantšu a Jesu pele a rotogela legodimong: “Ke le botša nnete ge ke re: Go tloga ga ka go a le hola, ka gobane ge nka se tloge Mothuši a ka se tle go lena. Fela ge nka sepela, ke tla mo roma a tla go lena” (Johanese 16:7). Ke mang Moya wo wo Mokgethwa, Mothuši, yo Jesu a bolelago ka yena?

Gateetee, modumo o bjalo ka moya wo o tšutlago ka maatla le mello ya maleme ya tšwelela godimo ga dihlogo tša bona, gomme poifo ya bona ya tšeelwa legato ke tumelo le khutšo. Moya wo Mokgethwa wa tsena go bona gomme gateetee ba ba le boitshepo bja go tšwa ka phapošing le go bega ditaba tše botse tša Jesu Kriste le lefase le le robegilego – le ge seo se be se hlaloša gore ba ka bolawa ka go dira se.

Go ketega thotogelo ya Jesu, ke nyaka go le botša mabaka a mararo ao a dirilego gore Jesu a tloge:

Lebaka la 1: Jesu o re lokišetša bodulo bja rena legodimong

Go Johanese 14:2-3 Jesu o re: “Ka ntlong ya Tate go na le madulo a mantši; ge go ka be go se bjalo, na nkabe ke le botša gore ke ya go le lokišetša madulo? Ge ke ile go le lokišetša madulo, ke tla boa ka tla ka le tšea gore le lena le yo ba mo ke lego gona.” Na o ikemišeditše ge Jesu a ka boa lehono go tlo re tšea go yo ba le yena?

Lebaka la 2: Jesu o a re rapelela le go re kgopelela go Tate

Go Baroma 8:34 re bala gore: “Bjale ke mang yo a ka ba bonago molato? Gape Kriste Jesu o hwile a ba a tsošwa, a yo dula madulong a bogoši kgauswi le Modimo, gomme o re rapelela go yena.” Jesu o itemogetše maikwelo a go swana la a rena lefaseng. Ka gona, ge re sa tsebe se goba ka fao re kago rapela mabapi le tlhohlo ya rena, re ka kgopela Moya wo Mokgethwa go re hlahla, re tseba gore le yena o a re kgopelela go Tate legatong la rena.

Lebaka la 3: Jesu o re file Moya wo Mokgethwa gore re kgone go bontšha lerato la Tate le maatla go lefase

Go Johanese 14:12-13 Jesu o re: “Ruri, ruri, ke le botša gore yo a dumelago go nna o tla kgona go dira dimakatšo go swana le tše di dirwago ke nna, a dira le tša go feta tšona, ka gobane ke ya go Tate. Gomme se le kago nkgopela sona le le ba ka, ke tla se dira, gore batho ba bone letago la Tate ka nna, Morwagwe.” Ka gobane re na le Moya wo Mokgethwa wa Modimo, ka nnete re ka bontšha maatla a gagwe le lerato go lefase le le robegilego. Na o a obamela ge a go bitša?

A re sa lebaleng gore ke ka lebaka la eng Modimo a rometše Morwa wa Gagwe go tlo re hwela. Gomme ka mehla a re lebogeng Jesu yo a tlogilego gore a yo re lokišetša lefelo le go re rapela legatong la rena. A re duleng ka mehla re obamela lentšu la Moya wo Mokgethwa gore re kgone go bontšha lerato le maatla a Modimo go lefase le le robegilego. Modimo a go šegofatše.