Na o a leboga? – Letšatši la 18

Go Be go le mathomong a Manthole 2011, gomme ke be ke sa le karolo ya lenaneo la mosong go Radio Tygerberg 104fm. Ba mmalwa ba bašomi-gotee ba rena ba ile Gansbaai go yo bona dišaka ka mokgwa wa go nwelela ka meetseng ba le ka gare ga serobe mosong woo gomme nakong ya lenaneo, re ba founetše go hwetša gore ba be ba itemogela eng sekepeng. Ka motsotswana fela, ra rulaganya dithekete tše pedi go ka nea batheeletši bao ba bego ba nyaka go yo bona dišaka ba le ka gare ga serobe.

Go ka thopa moputso, batheeletši ba be ba swanetše go romela karabo ya nnete ka SMS go potšišo e bonolo ka studiong. Ka metsotswana, re amogetše melaetša e makgolokgolo. Riaan e bile mothopasekofa gomme ra mo leletša mogala. O be a kwagala a maketše le go thaba sammaletee ge re mo tsebiša ka moputso wa gagwe.

Mathapameng ao, Riaan o etetše seteišene sa radio go tlo bolela ka bopaki bja gagwe. O re boditše gore morwa wa gagwe wa mengwaga e 12 o na le dikgwedi a mo kgopela go yo bona dišaka ka go mokgwa wa go nwelela ka meetseng ba le ka gare ga serobe kua Gansbaai. Riaan o tšere sephetho sa go ka šomiša ponase ya gagwe ya ngwaga le ngwaga go lefela leeto mafelelong a Manthole. Gomme gwa tla semaka! Ka lebaka la kgatelelo ya ekonomi, khamphani ye a e šomelago e paletše ke go lefa diponase. Gateetee, Riaan o be a sa tsebe ka fao a tlago phethagatša kholofetšo ya gagwe go morwa wa gagwe.

Dipoelo e bile gore Riaan o be a sena tsela ya go ka phethagatša kholofetšo ye ka ge a be a sena letseno le lengwe. Ka gona, a rapela ka yona gomme a kgopela Modimo mohlolo. Gomme a tlogela boemo ka diatleng tša Modimo. Ka ntle le tsebo ya rena ya pele ya boemo, Modimo o re hlahlile ka Moya wa gagwe wo Mokgethwa mosong woo go kgetha SMS ya Riaan go tšwa go tše makgolokgolo. Mantšu a Riaan mafelelong a kanegelo a nkgomme kudu ge a re: “Bjale nka botša morwa wa ka gore ga se fela mpho go tšwa go nna, tatagwe wa lefaseng, eupša gape go tšwa go Tatewešo wa Magodimong.”

Na le wena, bjalo ka Riaan, o hloka katlego ye Modimo fela a kago e abela? Theeletša mantšu go 1 Petrose 5:7: “Mathata a lena ohle le a lahlele go yena, gobane o a le šetša.” Go Bafilipi 4:19-20 re bala gore: “Gomme Modimo wa ka o tla le fa tšohle tše le di hlokago, go ya ka lehumo le legolo le a nago le lona ka Kriste Jesu. A go tumišwe yena Modimo Tatagorena go ya go ile!”