Na o a leboga? – Letšatši la 20

Ke nyaka go ruma lelokelelo ka kanegelo ya o tee wa bagale ba ka ba bannyane. Go sa šetšwe bohloko bjo bogolo le tlhophego ye a e kgotleletšego bophelong bja gagwe go fihla ga bjale, o dula a na le kholofelo, a phela letšatši le letšatši ka pelo ye e lebogago. Leina la gagwe ke Ulrich van Pletzen.

Ka 2009, a na le mengwaga e mene le seripa, Ulrich o fihlile le batswadi ba gagwe ka Letšatši la Ngwaga o Moswa. Ba be ba sa fološa merwalo koloing ya bona ge mpša ye e sa tsebjego e tšwelela gomme e hlasela Ulrich, e mo loma sefahlego. Ka ponyo ya leihlo, sefahlego sa gagwe sa golofatšwa bophelo ka moka.

Bookelong, dikeledi di be di ela difahlegong tša dingaka ka ge ba be ba swanetše go mo robatša ka diphilisi goba tšhwana boemong bjo bo emego thwii, ka ge ba be ba boifa gore a ka palela ke go hema ka lebaka la madi a mantši a a bego a elela sefahlegong sa gagwe. Bogare bja sefahlego sa Ulrich bo ile bja ripša. Le ge Ulrich a bile le diopareišene tše 13 go fihla ga bjale, o sa na le tsela e telele ya go ka fola. Go sa šetšwe se, Ulrich o phela a thabile, a kgatha tema dipapading tša go fapanafapana gomme a o kgathile tema boemong bja profense go papadi ya tšiministiki.

Mantšu a Ulrich mafelelong a bidio ge a anega kanegelo ya gagwe, a nkgwathile kudu. O re: “Ke nyaka go leboga batho ka moka bao ba nthatago le go nthekga. Ke nyaka go leboga gape jesu yo a nthušitšego gore ke phele. Ke a tseba gore o sa na le mošomo o mogolo wa ka lefaseng.”

Na o phela bjalo ka Ulrich, o leboga letšatši le lengwe le le lengwe le o okeletšwago bophelong bja gago – go sa šetšwe bohloko le manyami ao o kago itemogela wona nako le nako? Go Baefeso 5:20 re bala gore: “Ka ge le le ba Morena wa rena, Jesu Kriste, ka mehla le leboge Modimo, Tatagorena, ka lebaka la tšohle.” Go 1 Bathesalonika 5:18 go ngwetšwe gore: “Dilong ka moka sa lena e be go leboga, gobane tšeo ke tšona tše Modimo a di nyakago mo go lena ge le le ba Kriste Jesu.” Gomme go Pesalome 118:24 Mopesalome o re: “Le ke letšatši le le beilwego ke Morena; a re hlalaleng, re gobeleng go lona!”

Pelo ye e lebogago e tsepeletša mahlo a gago go Modimo. E re gopotša se a kgonago go se dira. Gape e re kgontšha go itemogela lerato le maatla a gagwe ka tsela e botse maphelong a rena. A re se kgaotšeng go leboga, re tseba gore Modimo o na le taolo ya bokamoso bja rena. Modimo a go šegofatše.