Na o a leboga? – Letšatši la 17

Nagana nakwana ka motho yo a go thatafaletšago bophelo. Ke molekani wa gago? Mošomi-gotee goba molaodi wa go selekega gabonolo mošomong? Mmatswale yo mobe. Rakontraka wa go aga yo a sa phethagatšago dikholofetšo tša gagwe? Ngwana wa gago wa manganga? Goba mohlomongwe mootledi wa go nanya yo a tswalelago mmila? O swaragana bjang le batho ba dihlogo tše thata goba maemo a a dirago gore o se iketle bophelong bja gago? Na o a ba rogaka goba o leboga Modimo?

Go ka leboga ka batho ba ba boletšwego ka godimo go bonala e ke ga go kgonege le go se kwešišege. Lega go le bjalo, o a lemoga gore sehlopha se sa batho se kgatha tema e bohlokwa bophelong bja gago? Mo ke mabaka a mabedi ao a ka bago gona:

Lebaka la 1: Batho ba dihlogo tše thata goba maemo a tšweletša se se diregago dipelong tša rena

Batho ba ba dihlogo tše thata goba maemo a re thuša go lemoga dilo tše di hlokago go fetoga maphelong a rena. Ga go makatše ge Mopesalome a rapela go Pesalome 139:23-24: “Mphetleke, Modimo, o tsebe pelo ya ka; ntekole, o bone khuduego ka go nna. Ntebelele ge ke na le bobe, gomme o nkiše tseleng ya go sa felego.” Ke ka lebaka la eng go le bohlokwa go Mopesalome gore Modimo a mo laetše se se diregago pelong ya gagwe? Re hwetša karabo go Pesalome 24:3-4: “Ke mang yo a ka namelago thaba ya Morena? Ke mang a ka tsenago ka Tempeleng ya gagwe ye kgethwa? Ke yo a dirago tše di lokilego, a nago le pelo ye botse.” Modimo ke yo mokgethwa gomme ge re batamela go yena, re tla rata go swana le yena. Maemo a boima le batho ba boima ba re thuša go bona se se swanetšego go fetoga – mola Moya wo Mokgethwa o re matlafatša go dira seo.

Lebaka la 2: Maemo a boima goba batho ba bopa dimelo tša rena

Semelo sa rena se bohlokwa kudu go Modimo go feta boiketlo bja rena. Dinako tše boima le batho ba re thuša go gola, go fetoša pono ya rena ya bophelo gomme se bohlokwa, go dula re tshephile Modimo. Ka gona, go a kwešišega gore go Baroma 5:3-5 re bala gore: “Re ikgantšha le ka mathata a rena, ka ge re tseba gore mathata a tliša kgotlelelo, kgotlelelo e dira gore re kgahle Modimo, gomme go kgahla Modimo go re tlišetša kholofelo. Kholofelo yeo ga e re swabiše …”

Ke go botšiša gape, ke mang yo a go thatafaletšago bophelo? Gopola, mootledi wa go nanya wa go hloka šedi ka gare ga sephethephethe a ka hlagiša go fela pelo ga rena le pefelo ye e sa hlokegego dipelong tša rena. Mošomi-gotee wa go selekega gabonolo goba molaodi o re thuša go gopola gore re swanetše re šome eke re šomela Modimo e se motho, mola sammaletee a re thuša go kaonafatša go itshwara ga rena. Gomme ngwana wa manganga, mmatswale yo mobe goba molekani yo thata a ka dira gore ke khuname ka mangwele moo re gopotšwago ka go tshephela ga rena go Modimo.

Ka gona, a re lebogeng Modimo ka batho ba dihlogo tše thata le maemo. O gare o bopa le go aga dimelo tša rena bjalo ka ditaamane, gore re kgone go phadimiša seetša sa rena go batho ba ba lego kgauswi le rena. Modimo a go šegofatše.