Na o a leboga? – Letšatši la 16

Na o hloka go tšea diphetho tše bohlokwa lehono? Na wena, go fa mohlala, o swanetše ke go tšea sephetho sa go sepela goba go dula, go hwetša mošomo o moswa goba go dula go wa bjale, go thoma lapa goba go leta goba go dira peeletšo e kgolo goba go se e dire? Goba o hloka go tšea sephetho sa gore o tlo šogana bjang le ngwana wa gago wa lerabele goba go lokiša lenyalo la gago le le robegilego?

O dira bjang sephetho? Na o kgopela Modimo keletšo le tlhahlo, le go tshepha khutšo pelong ya gago goba o no mo tsebiša morago ga ge o dirile diphetho?

Re tseba bjang gore re ka kgopela Modimo bohlale? Go Jakobose 1:5 re bala gore: “Eupša ge mo gare ga lena go ka ba le yo a hlokago bohlale, a bo kgopele go Modimo, gomme Modimo o tla mo fa bjona, ka gobane yena o fa bohle ka go se timane le ka go se balabale.” O na le sebetse sa go kgopela Modimo tlhahlo?

Re tseba bjang gore Modimo ka kgonthe o bolela le rena? Go Jesaya 30:21 re bala gore: “Ge le phamoga tsela le eya ka thoko efe le efe, le tla kwa lentšu ka morago ga lena le re: ‘Tsela ke ye. Tšeang ka yona.’ ” Moya wo Mokgethwa o re hlahla letšatši le letšatši. Na o theeleditše lentšu la gagwe?

Ke eng mohola wa go dira Modimo karolo ya diphetho tša gago? Go Diema 3:5-6 go ngwetšwe gore: “O tshephe Morena ka pelo ya gago ka moka. O se ke wa tshepha kwešišo ya gago. O gopole Morena dilong tšohle tše o di dirago, gomme yena o tla go lokišetša ditsela.” Gape go Mateu 6:33: “… le šomele mmušo wa Modimo le tše Modimo a nyakago gore le di phethe, gomme tše dingwe tšeo ka moka o tla le okeletša ka tšona.”

Modimo o tseba tše tlago hlaga nakong e tlago. Mo kgopele gore a go hlahle gomme o ka ba le nnete ya gore a ka go fetiša go mekoti ka moka tseleng ya gago. A re mo lebogeng ka seo. Modimo a go šegofatše.