Na o a leboga? – Letšatši la 15

Na o wetše ka molabeng wa go swarega kudu ka merero ya nakwana ya bophelo bjo mo e lego gore ga o iphe nako ya batho ba o ba ratago?

“Tate, nka go botšiša potšišo?” mošemane wa mengwaga e selela a botšitša tatagwe yo, gape, a fihlilego morago ga nako go tšwa mošomong gape a selekegile. “Ee, o nyaka go tseba eng?” tate a araba. “Tate, ke nyaka go tseba gore o lefelwa bokae ka iri kua mošomong?” Ye e be e le potšišo ya go makatša. “Ke ka lebaka la eng o nyaka go tseba se?” tate a botšiša ka kgalefo. “Se ke selo sa batho ba bagolo. Ga o hloke go tseba. Na le a kgantšha sekolong gore ke tatago mang yo a lefelwago kudu?”

Mošemana a šikinya hlogo gomme a kgopela: “Aowa, tate ga re kgantšhe. Ke hloka go tseba gore o lefšwa bokae ka iri?” Go ruma poledišano, tate a araba: “Ge e le gore o hloka go tseba, ke lefelwa mo e ka bago diranta tše 600 ka iri.” Mošemane a homola nakwana pele a ka botšiša: “Tate, ke kgopela o mphe diranta tše 300?” Ka kgalefo, tate a re: “Ge e ba o botšišitše gore ke lefšwa bokae gore o kgone go reka thoye, o ka ya go robala. Eya o nagane ka lebaka la gore ka mehla o a nyaka, nyaka, nyaka. Ke šoma gaboima letšatši ka moka gomme ga ke na nako ya dilo tša bana.” Mošemane a ya ka phapošing ya gagwe gomme a tswalela lebati ge tatagwe a dutše sofeng.

Morago ga go iketla nakwana, tate a thoma go ipona molato ka go ba bogale go mošemane. Mohlomongwe morwa wa gagwe o be a hloka diranata tše 300 go selo se bohlokwa. Ka ntle le moo, o be a sa kgopele tšhelete kgafetšakgafetša. Tate a ya phapošing ya mošemane gomme, ge a le gare a bula lebati, a botšiša: “O robetše, morwa?”O be a sa robala. Ge a dula fase bolaong, tate a re: “Tate o bile le letšatši le boima mošomong gomme go be go sa hlokege gore a be bogale go wena. Mo ke diranta tše 300 tše o di kgopetšego.” Sefahlego sa mošemane sa kganya le semeetseng gomme a re: “Ke a leboga, Tate!” Gomme a tsoga bolaong, a bula laiki gomme a ntšha tšhelete tša pampiri tša go šošobana gomme a thoma go di bala.

Tate o ile a swanela ke go loma leleme ge e bona gore morwa wa gagwe o be a šetše a na le tšhelete. Ge mošemane a fetša go bala tšhelete, tatagwe a botšiša: “Ke ka lebaka la eng o nkgopetše tšhelete ge e le gore o be o šetše o na le yona?” Mošemane a lebelela tatagwe gomme a re: “Ke be ke se na tšhelete ye e lekanego, Tate. Eupša bjale ke na le yona. Mo ke diranta tše 600. Nka reka iri ya nako ya gago?”

Ke eng dilo tše di tlago pele bophelong bja gago? Na o swaregile kudu mo baratiwa ba gago ba tlago thoma go ikwa o ka re ba swanetše ba “reke” nako ya gago? Go Pesalome 118:24 Mopesalome o ngwala gore: “Le ke letšatši le le beilwego ke Morena; a re hlalaleng, re gobeleng go lona!”

Letšatši la lehono ke mpho. O ka se tsoge o humane letšatši le morago. Gopola gore bana ba gago ba tlo gola le molekani wa gago o tlo tšofala. Na o ipha nako ya bana ba gago le go ba swara ka tsela ye ba ka ratago go go etela ge ba šetše ba godile? Na o beeletša go lenyalo la gago gore wena le molekani wa gago le tla ba le se le bolelago ka sona ge le šetše le tšofetše?

A re lebogeng letšatši la lehono le go keteka motsotso o mongwe le o mongwe o ra nago le ona go laetša baratiwa ba rena gore re a ba rata. Modimo a go šegofatše.