Na o a leboga? – Letšatši la 14

Yo mongwe o mpotšišitše gore: “Ke ka lebaka la eng re swanetše go rapela ge e ba Modimo o tseba se re se hlokago?” Potšišo ya ka go wena, lega go le bjalo, ke gore: “O boletše neng le Modimo la mafelelo mabapi le ditlhohlo tša gago, o mo kgopela gore a šome ka gare ga bophelo bja gago?”

Re na le piano ye e šomago ka mohlagase kua gae. Morwedi wa ka, Joalé, o rata mmino gomme se tee sa dilo tše bohlokwa sa letšatši la gagwe ke ge ke mmotša gore re yo raloka piano. O tla kitemela go piano gomme a le gare a eme ka ditsetsekwane, a obeletša go ka tlanya dikhiya tša piano ka kholofelo ya gore o tla kwa modumo. Bothata, lega go le bjalo, ke gore e šoma ka mohlagase, gomme e ka se tšweletše modumo ge e sa kgokaganywa le mothopo wa mohlagase. Se gantši se dira gore a ntebelele a tomotše mahlo o ka re o botšitša gore: “Go reng go se na modumo, Mma?”

Modimo ke mothopo wa maatla gomme ge re rapela, o bontšha maatla a gagwe go rena. Re bala go Pesalome 139:4: “Le pele ga ge ke ahlama, Morena, o tseba ka botlalo se ke tlago se bolela,” re bala gape go Jakobose 4:2b: “Ga le hwetše se le se nyakago, ka gobane ga le se kgopele go Modimo.” Ka gona, le ge Modimo a tseba ka manyalo a rena a boima, mathata a ditšhelete, tlhohlo ka bokoto bja rena goba tswalano e mpe le maloko a lapa, o sa nyaka gore re boledišane le yena ka yona.

Thapelo e fetola pono ya rena ka tlhohlo efe goba efe ye re ka kopanago le yona. Ga e re thuše fela ka go ikokobetša le go ithekga ka Modimo, e re thuša gape go hlokomologa tlhohlo, ra tsepela go Modimo. Go swana le go dumelela Modimo go tlatša mafelo a go oma, a setu maphelong a rena ka mmino wa maemo a godimo.

Re tseba bjang gore thapelo e a šoma? Go Mateu 7:7 Jesu o re: “Kgopelang, gomme le tla fiwa; nyakang, gomme le tla hwetša; kokotang, gomme le tla bulelwa.” Go Bathesalonika 5:17 re bala gore: “Le se kgaotše go rapela.” Gomme go Markose 11:24 Jesu o re: “Ka lebaka leo ke le botša gore tšohle tše le kago di kgopela ka thapelo, le dumele gore ruri le tla di fiwa, gomme le tla di fiwa.”

O boletše neng la mafelelo le Modimo – e se fela metsotso e mehlano mosong goba mantšiboa, eupša letšatši ka moka gape o le gare o theeleditše lentšu la gagwe ge a fetola ka Moya wa gagwe wo Mokgethwa? Na o a mo mema go ba karolo ya diphetho ka moka tša gago goba o no mo tsebiša fela morago ga ge o di dirile? Gopola, Modimo ga a putume goba go robala. O šetše a na le mmino wa maemo a godimo. Ikgokagantšhe le yena gomme o tla makatšwa ke se a kgonago go se dira bophelong bja gago. Modimo a go šegofatše.