Na o a leboga? – Letšatši la 13

Lentšu le dikholofetšo tša Modimo ke nnete. Mo ke ka fao Evert Potgieter, mmadi wa Mossel Bay, a itemogetšego potego ya Modimo mengwaga ya go feta:

Evert: “Ke bile moeletši wa tša ditšhelete go feta mengwaga e 20. Ka ge ke šoma ka morokotšo gomme ke sa amogele mogolo o o beilwego mafelelong a kgwedi, tumelo ya ka e lekilwe ka dinako tša go fapanafapana. Le ge ke le ngwana wa Modimo, gomme ke ithekgile ka yena ka mo go feletšego, ka dinako tše dingwe go boima go mo tshepha dinakong tše boima. Lega go le bjalo, ga se a ka a nnyamiša.

Ka 2014, ke bile le nako e boima kudu ya mathata a ditšhelete mošomong wa ka ye e dirilego go re ke botšitše ge e ba dithapelo tša ka di be di fihla go Modimo. Ke nolegile moko, ka thoma go bula diemeile tša ka mosong wa 8 Mosegamanye. Moranang e be e bonala o ka re ke kgwedi e mpe kudu mošomong wa ka wa mengwaga e mentši gomme kgwedi ya go latela e be e sa holofetše le yona.

Mosong nakong ya ka ya setu le Modimo, ke badile thapelo ye sehlogo sa yona se rego ‘Ke leboga ka tetelo’. Thapelo e be e le mabapi le ka fao re swanetšego go leboga Modimo e sa le pele ka dikatlego tša rena ge re sa letile. Molaetša o be o sepedišana le boikwelo bja ka. Ke badile Lengwalo go 2 Dikronika 20 gomme ka itemogela ka fao Modimo a bego a mpotša, bjalo ka ge a boditše Joshafate le Baisraele, go emiša go lwa ka bobona, gomme ba mo dumele go lwa legatong la bona. Ka neela Modimo gape tšohle bophelong bja ka, ka mo leboga e sa le pele.

Ge letšatši le sobela letšatši leo, moputso wa ka o be o le wa mošomo wa dikgwedi tše pedi! Go bile mohlolo, go laetša potego ya Modimo go nna gape! Ga a tumišwe!”

Evert o nepile. Modimo o a botega ge re mmea pele, re mo tshepha go tšohle, ga a re nyamiše. Go Numeri 23:19 re bala gore: “Modimo ga se motho a kago bolela maaka; ga se motho, yo a kago itshola.” Gomme go Doiteronomio 7:9 re bala gore: “Gopolang gore Morena Modimo wa lena ke yena Modimo a nnoši, le gore o a botega.”

Na o nyaka katlego lefelong la mošomo, ditšheleteng tša gago, lenyalong la gago goba ka tša maphelo a gago? Theeletša gape kholofetšo go Jesaya 43:19: “Bonang, ke tla dira se sefsa; se šetše se tšwelela gonabjale – le a iponela ka bolena! Ke tla phula tsela lešokeng, ka ediša dinoka nageng ye e omilego.”

Modimo ke wa rena. A ka fetola seemo sefe goba sefe, bjalo ka sa Evert, go tšwa nageng ye e omilego go ya go ye e tletšego ka dinoka. Ka gona, a re mo lebogeng ka go botega ga gagwe mola re tlogela go lwa ka maatla a rena gomme re mo dumelele go lwa legatong la rena. Modimo a go šegofatše.