Na o a leboga? – Letšatši la 12

Ka Lewedi 2008, Ledimogadi Ike le fetile Cuba, Haiti, Dominican Republic le Northern America ka matšatši a 13, la bolaya batho ba 195 le tshenyo ye e balelwago go dibilione tše 10 tša ditolara tša Amerika (mo e ka bago 150 bilione ya diranta). Tše dingwe tša dintlo tše di bapilego le lebopo la Texas di sentšwe ke meoya le meetse.

Tshenyo e be e makatša. Lega go le bjalo, diswantšho tše pedi tše di tšerwego morago ga fao di tantše šedi ya ka. Sa pele se tšerwe kua Gilchrist, Texas. Dintlo ka moka go bapa le lebopo di be di pšhatlagantšwe, ka ntle le e tee. Ntlo e be e eme thwii eka meoya le meetse di be di laetšwe go feta ka thoko ga yona ka ntle le go e pšhatlaganya. Se sengwe seswantšho sa go kgahliša e be e le sa ntlo kua Winnie, Texas. Gape, meetse a fihlile ntlong ye e bego e le polaseng, a pšhatlaganya dilo ka moka ka ntle le ntlo ye e bego e se ya kgomiwa.

Maphelong a rena, re na le go itemogela madimo – manyalong a rena, malapeng, ditšheleteng, go pheleng ga rena gabotse mebeleng goba lefelong la mošomo. Go bonagala eke madimo a a tlo re aparela. Barutiwa le bona ba itemogetše se. Ba be ba le ka gare ga leselawatle ka gare ga ledimo, ba nagana gore ba tlo hwa. Ka go boifa, ba tsoša        Jesu yo a bego a robetše nakong ya ledimo. A emelela gomme a laela ledimo go homola. Gomme la homola le semeetseng.

Modimo a ka dira ka mo go swanago ge o itemogela ledimo gomme a ka go fa khutšo, ka ge seo e tla ba maatla a gago ntweng ya gago. Go Jesaya 43:1-3 Modimo o re: “Le se ke la boifa – ke le hlakodišitše. Ke le biditše ka leina la Israele – le ba ka. Ge le tshela noka ye e išago, ke tla ba le lena; matshwenyego a lena a ka se le tšee bjalo ka lefula. Ge le putla mollo le ka se tlaboge, gobane nna ke Morena Modimo wa lena …” Gomme go Bafilipi 4:6-7 re bala gore: “Le se balabale ka selo; sengwe le sengwe se le se nyakago le se kgopele go Modimo ka moya wa thapelo le tebogo. Ke mo Modimo a tlago le phefiša go ja pelo le go tshwenyega le le ba Kriste Jesu, mo e lego gore ga go motho yo a kago kwešiša.”

Tsela e kaone ya go nagana gabotse ka gare ga boemo bja ledimo, ke go tšwela pele o tsepeletše Modimo. Ge re ikgopotša yo a lego yena le se a kago se dira, re tla tlala ka khutšo dipelong tša rena. Go tseba gore Modimo o a re šireletša le go re, mafelelong, o na le taolo ya seemo se sengwe le se sengwe, go tliša khutšo ye e fetago kwešišo. A re direng khutšo go ba phihlelelo ya rena le go leboga Modimo ka dinako ka moka. Modimo a go šegofatše.