Modimo wa lerato, kholofelo, kgaugelo le khutšo – Letšatši la 20

“Gona Morena, Mong wa bohle, o tla go fa sešupo ka boyena: Kgarebe e imile gomme e tla belega morwa ya mo thea leina la Imanuele.” Jesaya 7:14

Imanuele, Modimo o na le rena. Go rena Bakriste, leina le le amantšhwa le molaetša wa Krisemose. Johanese 1:14 e re, “Yena Lentšu e bile motho, a dula le rena e le yo botho kudu go rena, a re utollela ka botlalo se Modimo a lego sona.” Modimo o tšea kgato ya pele go tsošološa tswalano magareng ga gagwe le bana ba gagwe. Ka nama o fihleletše batho, go ba le rena. E bile motho go ba karolo ya rena.

Leineng le, “Imanuele, Modimo o na le rena”, ke kgaugelo e kgolo ka go fetišiša! Modimo o tšere sephetho sa go ba karolo ya rena. O tšere sephetho sa go re nea monyetla wa bobedi. Yeo ke kgaugelo!

Simon Tugwell o ngwetše gore, “Modimo ke yena re mo latelago. O nyaka rena. Kholofelo ya rena e maikemišetšong a gagwe go re phološa. A ka se re nyamiše.” Re ka bota Modimo yo a sa ineelego ka rena.

Seretong sa gagwe sa go tuma, The Hound of Heaven (1893), moreti wa Moisemane, Francis Thompson, o hlaloša Modimo, yoo ka kgaugelo ya gagwe ye kgethwa, “go kitimiša ka go se akgofe/le ka lebelo la go se tshwenyege/lebelo la ka boomo, ka borena bjo akgofilego”, a tšwelago pele go šala morago motho wa pelo e thata go fihlela a retologela go Modimo.

Seswantšho se se ntlatša ka kgothatšo e ntši le kholofelo, ka gobane ke gopola makga a mantši bophelong bja ka moo ke paletšego ka boomo ke go nyaka bogona bja Modimo; dinako moo ke lekilego go tšhabela Modimo, goba ka go se tshwenyege ka tšwela pele go dira tša ka.

“Kgarebe e tla ima, ya belega morwa yo a tlago bitšwa Imanuele” (ke go re “Modimo o na le rena”) Mateu 1:23.

Modimo o na le rena. Ka lehufa o šetša bana ba rena. Ye ke kgaugelo!