Modimo wa lerato, kholofelo, kgaugelo le khutšo – Letšatši la 19

Morongwa a re go yena: “Se tšhoge, Maria, gobane o kgahlile Modimo. O tla ima, wa tla wa belega morwa yo o swanetšego go mo rea leina la Jesu.” Lukase 1:30-31

Modimo o rometše morongwa Gabriele go kgarebe kua Nazaretha, kgarebe ye e bitšwago Maria, gomme a mmotša ditaba tša gore o kgethilwe; o tla ima a belega morwa. Gomme gateetee, morongwa a mmotša gore a mo ree leina la Jesu.

Leina la Seheberu la Jesu le swana kudu le leina la Joshua, leo le hlalošago gore phološo.

Morongwa wa Morena gape o tšweletše go Josefa torong go bolela le yena ka Maria le go mo kgodiša gore a se fediše peeletšo, ka gobane o imišitšwe ke Moya wo Mokgethwa. “O tla belega morwa, gomme o mo ree leina la Jesu, ka gobane o tla phološa setšhaba sa gabo dibeng tša sona” (Mateu 1:21). O botša Josefa leina le ba swanetšego ba le ree ngwana, “Jesu, ka gobane o tla phološa setšhaba sa gabo dibeng tša sona.”

Modimo o romela morongwa pele ga matswalo a Jesu go tiišetša diprofeto tša baprofeta tša mengwaga ye e fetilego: mo ke Mophološi! Morongwa o bega leina la ngwana – Jesu – leina le le nago le kholofetšo.

Leina le ke la go ya go ile. Le ke leina le batho ba le bitšago dinakong tša leswiswi le ge ba lahlegetšwe ke kholofelo, gomme le tliša phološo. Bakriste, mo mengwageng, ba swareletše go kholofetšo ye. Leina le le tliša kholofelo, topollo, monyetla wa bobedi, bophelo bjo boswa le mathomo a maswa! Leina le le hlaloša lerato le legolo la Modimo go rena, bana ba gagwe!