Modimo ke Mang? – Letšatši la 20

Ge re nyaka go bontšha selo, re tla se bea lefelong le go nago le seetša kudu gore se tle se bonwe le go thabelwa, gomme gape re ka fetoša seetša go se laetša gabotse. Ge re ya pontšhong goba khonsateng, lebone la go taga kudu le a šomišwa go dira gore motho wa go tuma a bonagale go bohle. Go tla ba bjang ge Modimo, Morena Ramaatlaohle wa tlholo, a ka bewa ka gare ka lebone le le phadimago kudu?

Ditemana tša lehono di hlakile go fetoleng karolo ye nngwe ya potšišo ya rena: “Modimo ke Mang?” Ke seetša; go Yena ga go leswiswi gomme 1 Timotheose 6:16 e re botša gore ke Yo “… a dulago seetšeng se go sego yo a kago se batamela” seo e lego se re kago se letela ge re ka botšišwa gore re phopholetše. Go a kwagala gore bokgethwa, bjalo ka borena, bo tla bontšhwa ka phadimo ya letago gomme bja se utwe leswiswing. Lengwalo le le hlaloša gabotse gore seetša le go loka ke mahlalošetšagotee, le gore bao ba sa sepelego le Yena ba sepela leswiswing.

Ge re ka ema go nagana ka yona, mo e ka bago tlhalošo e nngwe le e nngwe ya seetša e na le selo se sebotse ka yona. Sa pele, re bona gabotse seetšeng, eupša re a kgopša leswiswing; batho ga ba tšhabe seetša, eupša batho ba bantši ba bagolo le bana ba tšhaba leswiswi; seetša se bohlokwa bophelong, ka ge ntle le sona re ka se be le borutho goba maemo a mabotse gore dilo di gole; se re thuša go matlafatša maemo a Vitamine C le D tšeo di re dirago gore re phele gabotse mmeleng, gomme batho ba na le kgonagalo e ntši ya go ka se gateletšege mahlaseding go e na le dinako tše telele tša leswiswi. Bophelong, ka nnete re hloka seetša. Ekaba ga re hloke gape seetša sa semoya?

Ge Modimo a hlola legodimo le lefase gomme go na le fela leswiswi godimo ga go se be le sebopego, go se be le selo, A hlola seetša pele: “Gomme Modimo a laela a re: ‘A go be le seetša’ – seetša sa ba gona. Modimo a se bona, a kgahlega. A aroganya seetša le leswiswi, …” (Genese 1:3-4). Ka gona re ithuta gore: Modimo o hlodile seetša gomme Ke seetša. A ka se tsoge A le leswiswing, ekaba nameng goba moyeng. Go thweng ka rena?

Ka go Testamente ye Mpsha, ge Paulose a botša kereke ya Korinte gore ba se gogišane le bao e sego badumedi, o ba botšiša potšišo ya gore: “… gobane toka e ka sepedišana bjang le go se loke? Kgane seetša le leswiswi tšona di ka dudišana?” (2 Bakorinte 6:14).

Re swanetše go ipotšiša gore: “Nna ke kae seswantšhong se segolo? Ekaba ke seetšeng goba leswiswing?” Tsela e le tee fela mo re kago dula seetšeng ke go itsenya Lentšung la Modimo letšatši le letšatši: “Lentšu la gago ke lebone la go ntlhahla, ke seetša tseleng ya ka” (Pesalome 119:105).