Modimo ke Mang? – Letšatši la 19

Mantšu a a nkgopotša kelelo ya go sepetša dimpša nakong ya go feta thapameng yeo ka yona pula e bego e ena. Morago ga ge di be di tswaleletšwe ka lebaka la pula, dimpša di be di tletše mafolofolo gomme di ikemišeditše kudu go nkitimiša ka go dikologa. Go be go thelela gomme dieta tša ka di be di thelela ka nako gomme ke nyakile ke ewa makga a mmalwa, eupša ka mogau wa Modimo ka kgona go itshwara ka tšwela pele le go di kitimiša!

Ge re bala Pesalome 73 ka moka, re a bona gore ga e mabapi le go thelela ga nama, ka ge ke itemogetše, eupša go thelela ga moya. Asafo, Mopesalome, o wetše sebeng sa tumo, gomme o se dumelela gore se mo tshwenye kudu moo se amago bophelo bja gagwe. Se mo ja bjalo ka kankere gomme ga a kgone go kgaotša go bapetša bophelo bja gagwe bja go ikgafa gabonolo go Modimo, le maphelo a go se kgathalege a batho ba go huma, ba maatla gape ba go phela gabotse mmeleng, gomme o ikweša bohloko ka se, ka mehla a botšiša gore ke ka lebaka la eng ba atlegile kudu mola yena a sa atlega.

Go a makatša gantši ka mo re ka go bona fela dilo ka mmono wa rena, gomme go dira gore re ikokobetše ge re lemoga gore re fošitše. Go sa šetšwe gore motho yo mongwe ke mang goba se a se dirago, ke rena bao re tlošitšego mahlo a rena go Modimo le leano la Gagwe la bophelo bja rena gomme ra tsepelela go motho yo re sa mo gonenego yo re ntšhetšago lehloyo la rena go yena, gomme gantši seo se re bakela manyami. Ke ga kae ge se se direga re gadimago morago gomme ra bona mabaka a ka ntle a na le seabe go sona. Ge e le gabotse ga go se re swanetšego go se duma go motho yo mongwe goba boemong bja bona; eupša go a direga gore re tsepelele go tšona ka nako ya rena ya go fokola gomme re ba batšwasehlabelo ba kahlolo ya rena.

Ka mo go holago yena, Asafo o bona phošo ya gagwe ge a ya tempeleng go yo rapela. O ithuta ka pheletšo ye e letešego bakgopo, gomme a lemoga sebe sa gagwe le go se bolela go Modimo. A lemoga gore o nyakile a e tšwa tseleng ya nnete ka gobane o dumile bakgopo. O lemoga gore se a nago le sona ke se bohlokwa kudu go feta mahumo a lefase gomme o bolela mantšu a mabotse a tumelo ya go swana le ya ngwana go Modimo: “Fela ke dula ke na le wena, mme wena o dula o ntshwere ka seatla sa la go ja. O ntlhahla ka keletšo ya gago; ka morago o tla nkamogela wa nkgodiša. Ke eng se ke nago naso legodimong ntle le wena? Gomme ge wena o le wa ka, lefaseng ga go sa na se ke se nyakago. Le ge nka palelwa mmeleng le moyeng, Modimo yena ke maatla a ka; ke wa ka go ya go ile” (Pesalome 73:23-26).