Modimo ke Mang? – Letšatši la 11

Ponagalo, go maemo ka moka, e bohlokwa go rena. Ka moka ga rena, ntle le pelaelo, re itemogetše maemo moo dihlopha di kgethilwego gomme moetapele yo mongwe le yo mongwe o kgetha go tšwa sehlopheng go tlatša sehlopha sa gagwe ka batho ba ba telele, ba lebelo, goba ba go ba le bokgoni bjo bogolo. Ga go be gabotse ge ba banyenyane ba šala ka gobane mang le mang, go akaretša bao ba šetšego, ba a tseba gore ga ba bonwe ba lokile bjalo ka bao ba šetšego ba kgethilwe.

Barwa ba Isai ba bile le boitemogelo bjo bjalo ge Modimo a romile Samuele go kgetha kgoši ye e latelago ya Israele magareng ga bona, le ge mo, ka o tee ka o tee ba gomišitšwe ge Samuele a phethagatša thato ya Modimo.

Ya pele ya ditemana tše e bolela ka Eliaba, morwa wa pele wa Isai, yo a kgahlilego Samuele kudu, eupša ye re bonago e se kgetho ya Modimo. Ge e le gabotse, karabo ya Gagwe e bile ye e swanago go barwa ba šupa ba Isai, bao ba ilego ba ikwa ba nolegile moko ge ba lemoga gore ke fela morwa yo monyenyane, Dafida, yo a bego a šetše, gomme ke mang yo ka nnete a bego a nyaka gore a bušwe ke yena? Ba be ba sa mo tšee bjalo ka monna ka ge a be a rometšwe go yo hlokomela dinku tša tatagwe, mola bona e be e le mašole ao a bego a biditšwe go tlo lwela Saule, yoo e bego e le kgoši ka nako yeo.

Sa go kgahliša ke gore, ge Dafida a tsena, morago ga ge tatagwe a mmiditše go tšwa lešokeng morago ga ge Samuele a botšišitše Isai gore o na le barwa ba bangwe, re kwešiša gore e be e le lesogana le lebotse; eupša se bohlokwa kudu, ke gore ke yena yo Modimo a mo kgethilego ka lebaka la boitshwaro bja pelo ya gagwe le yo A tlago mo matlafatša ka maatla a Moya wa Gagwe.

Morago, go 1 Samuele, ge madira a Saule a elwa le Bafilista, Dafida e ba thwadi ka gobane yena a le tee o bona tlhohlo ya senatla, Goliate, nkgwete ya Bafilista, bjalo ka thogako go Modimo gomme o ithaopa go lwa le yena, mola mašole a mangwe, go akaretša bomorwarragwe, ba tšhaba go lwa le yena.

Ekaba se se re botša eng ka Modimo?