Modimo bjalo ka mothopo wa kholofelo – Letšatši la 2

Go na le seswantšho sa lentšu se sebotse sa Morena Modimo a sepela ka Serapeng sa Edene a bitša Adamo: “O go kae?” Ka gobane Adamo le Efa, ba tseba se ba se dirilego, ba be ba utametše Modimo (Genese 3:8-9).

E ka ba e bile ba mathomo go utamela Modimo eupša ka nnete e be e se ba mafelelo. Batho ba ba gobošitšwego ke ditiro tša bona ba tšwela pele go dira bjalo lehono.

Go bonolo kudu go utamela Modimo go e na le go ya go yena gomme wa ipolela dibe tša gago. Go goketša kudu go hlokomologa Modimo gomme wa tsepelela go dilo tša lefase goba go ikgobokanyetša lehumo. Ka manyami, gape ke tsela ye e išago kotsing.

Ka Bibeleng ka moka molaetša o kwagala gabotse: Modimo ke mothopo wa kholofelo ka moka.

Moprofeta Jeremia o bolela gabotse: “Morena, wena Mmotwa wa Baisraele, bohle ba ba go tlogelago o a ba swabiša. Ba ba go furalelago ba tla hwelela bjalo ka maina a a ngwadilwego mobung, ka ge ba tlogetše wena, Morena, mothopo wa meetse a a phedišago” (Jeremia 17:13).

Jeremia o bolela gabotse gore Modimo ke bobedi kholofelo ya setšhaba le kholofelo ya motho. Gape o bolela gabotse ka pheletšo e sehlogo e e letetšego bao ba hlanogelago Modimo.

Kholofelo ya Bakriste e tšwa go gomme ga e aroganywe go tumelo go Modimo. E tiišetša tumelo ya gore se Modimo a se thomilego go Kriste se tla phethega ka letšatši la bofelo. “Ke yena a re filego mahlogonolo a Modimo ka tumelo ya rena ao bjale re phelago ka ona. Ke ka lebaka leo re ikgantšhago ka letago la gagwe le re le holofetšego (Baroma 5:2).

Bjale seo ke selo se re ka se holofelago. Kgopolo ya gore letšatši le lengwe re tla ba karolo ya letago la Modimo e swanetše go re tlatša ka lethabo le khutšo.

Re hlankela Modimo yo mogolo.