Mo tumiše – Letšatši la 3

Bophelo bjo boswa ke mošomo wa Modimo – ge e le gabotse, yena ka noši o tšere sepheto sa go hlola motho ka seswantšho sa gagwe, go swana le yena. Setifikeiti sa matswalo ka gona e ba bohlatse bjo bogolo bja go kgatha tema ga go tšwela pele ga Modimo le batho. Ga go makatše ge Dafida a mo tumiša ka mošomo wo o mmotse wa tlholo: “Ditho tša ka tšohle di hlodilwe ke wena; ke wena o di kgomagantšego ka popelong ya mma. Mola ke bopša ka sephiring, mola ditho tša ka di kgomaganywa ka hloko ka popelong ya mma, ga go na le le tee la marapo a ka le o bego o sa le bone. O mpone le pele ke belegwa. Matšatši ohle a ka a go phela a be a šetše a ngwadilwe ka pukung ya gago, go sešo gwa tšwelela le le tee la ona” (Pesalome 139:13,15-16). Se se dira gore Dafida a lle: “Ke go reta ka ge o mpopile ka mo go makatšago gape go tlabago.”

A thabišitšwe ke tlholo ye e botse ye e bego e phagamišitšwe gaešita ka godimo ga magodimo, dinaledi le ngwedi, Dafida o botšiša potšišo ye e sa nyakego karabo: “Eupša o mo hlaeditše gannyane a se lekane le wena; o mo godišitše ka letago le tlhompho. O mmeile mmuši wa mediro yohle ya atla tša gago; wa mo dira molaodi wa tšohle: dihuswane le dikgomo tšohle, ešita le diphoofolo tša naga” (Pesalome 8:5-7). Gomme o phagamiša leina le legolo la Morena ka se: “Morena, Mong wa rena, leina la gago ke le legolo bjang lefaseng lohle!” (Pesalome 8:9).

Morena gape o ba karolo ya go tswala ga semoya ga motho yo a kgethago go dumela go Modimo le Jesu. Ka gobane re ile kgole le leano la gagwe la pele ka rena, Modimo re boelanya le yena ka Kriste, gomme ka lebaka leo re ba sebopiwa se sefsa (2 Bakorinte 5:17-19).

Baefeso 2:10 e re mošomo wa diatla tša gagwe (poiema ka Segerike), re hlodile (poieo) go Jesu Kriste. Lentšu le le ra mošomo goba tlholo ka mong wa babetli. Seo ke sona se Mohlodi Modimo wa rena e lego sona – Rakgabo wa Sekgwari, yo bothakga bja gagwe bo se nago thaka. Go feta moo, ke Sereti sa mehla ka moka, ka gobane lentšu la Seisimane “sereto” le tšwa go poiema. Re tlholo ya go ikgetha – batho ba tlhago ya Modimo gomme ka tsela ya theto re hlamilwe ke letsogo la mong la Tatawešo!

Re a go tumiša, Mohlodi! Re ya go phagamiša, Mongwadi wa maphelo a rena ao a tletšego moretheto, morumokwano le tekatekano. Re sereto sa gago sa batho – gomme re nyaka go phela maphelo a a go tumišago!