Mo tumiše – Letšatši la 2
Mo tumiše!
(Di)temana ya Bibele
Pesalome 145
Sereto sa go tumiša Modimo
Mehlare le matšoba ka ntle le lentšu di tumiša ka lethabo botala le boswa bjo bo phadimago bja sehla sa seruthwane. Se bolela ka bophelo le kholofelo le go re gopotšaka kholofetšo ya Modimo ya gore ka mehla o tla ba karolo ya tlholo ya gagwe. Leo ke lebaka le le lekanego la go ka mo tumiša le go mo godiša, eupša gantši maatla a rena le maphelo a meditšwe ke lefase le le hlakahlakanego, la go hloka thulaganyo gape le le robegilego leo re phelago go lona, mo gantši re sa naganego ka go mo tumiša.
Go tumiša Modimo ga go itiragalele, gantši go nyaka gore motho a tšee sepheto. Go Pesalome 42:5 mongwadi o bolela le yena: “Wena pelo ya ka, o reng o hlokofetše gakaaka? O reng o ferekane? Tshepha Modimo, gobane ke tla buša ka mo tumiša …” Go Sefela sa ge go iwa Tempeleng Jerusalema go rapela mongwadi o bitša bohle bao ba hlankelago Morena go mo tumiša: “Etlang le tumišeng Morena, lena bahlanka bohle ba gagwe le lalago le letetše ka ntlong ya gagwe. Phagamišetšang matsogo Tempeleng le tumišeng Morena” (Pesalome 134:1-2).
Ge mopesalome a nagana ka botšofadi bja gagwe, o ikana go tumiša Modimo ka go se kgaotše: “Nnaena ke tla dula ke tshephile wena; ke tla go tumiša ke ntše ke eya. Ke tla hlwa ke laodiša ditiro tše o re phološitšego ka tšona, etšwe nka se kgone go di bala” (Pesalome 71:14-15).
Lebaka la gore ke Modimo le swanetše le be tlhohleletšo e e lekanego go wena bjalo ka modumedi go mo tumiša. Ge o nyaka lebaka le legolo kudu, ke Modimo wa go loka, ke Modimo yo botho (Esra 3:11); o a bolela, o a bona, o a kwa le go hema (Pesalome 135:16-17). Ke Modimo wa badimo … lerato la gagwe ke la go ya go ile; ke Morena wa marena … lerato la gagwe ke la go ya go ile; ke yena fela a dirago mehlolomegolo … lerato la gagwe ke la go ya go ile (Pesalome 136:1-4).
Ge eba o sa ipotšiša mabapi le lebaka la go mo tumiša, nagana ka se: O kwa dithapelo tša rena gomme a re fa maatla a maswa (Pesalome 138:3); o fepa diphedi tšohle ka dijo (Pesalome 136:25); ke kholofelo le tshepo ya rena (Pesalome 71) gomme ke yena fela yo a ka dirago gore re robale ka boiketlo (Pesalome 4:8).
