Mo tumiše – Letšatši la 22

Thapelo ke mogala wa kholofelo wo o kgokaganyago motho yo a sego bohlokwa le Modimo yo mogolo. Ka kgokagano yeo ya tlemagano re a rapela le go ba le kholofelo ya rena, ya baratiwa ba rena, badumedi-gotee le ba go se dumele. Thapelo ke go feta pitšo ya tšhoganetšo go ka fihlelela dinyakwa, gape ke mogala wo o hlolago maatla gore ka Moya wo Mokgethwa ke kgona go phela bjalo ka ge Modimo a nyaka. Thapelo ka gona ke poledišano ya ditsela tše pedi magareng ga Modimo le batho. Letšatši le letšatši, ke letela ka kholofelo, ka tlhokomelo e feletšego, ge ke bala Lentšu la Modimo gore Moya wo Mokgethwa o utolle thato ya Modimo go nna.

Theeletša se Lentšu le šetšego le re botša sona mabapi le thato ya Modimo. Bjalo ka badumedi le barwadi ba seswantšho sa Modimo lefaseng, re hloka go hlompha Modimo ka go phela gabonolo le go dira se a se nyakago. Re ka tseba se a se nyakago ka thapelo le go kgopela gore ka mehla re tlale ka “… tsebo ya thato ya gagwe, ka bohlale bjohle le kwešišo yohle ye e tšwago go Moya wa gagwe” (Bakolose 1:9). Se se bolela gore re swanetše go phela ka Moya (Bagalata 5:16) le go dumelela Modimo go re hlahla. Go tseba thato ya gagwe go sepelelana le go tšwela pele le go tseba Modimo (Bakolose 1:10) – go tseba pelo ya gagwe, bogolo bja Modimo bjo bo se nago thaka.

Bophelo bjo bjalo bo tliša ditlhohlo go modumedi yo mongwe le yo mongwe. Bo nyaka bophelo bjo tsepeletšego go Modimo le kgotlelelo. Go boima? E se ge re kgopela Modimo go “tiišwa ka maatla ohle a go tšwa bogošing bja gagwe bja letago, gore le kgone go kgotlelela tšohle le sa fele pelo” (Bakolose 1:11).

Thero ya Jesu le thutišo ka tsela ya go phela ya modumedi wa Mokriste e mabapi le lerato. Ka ntle le lona, ga re selo (1 Bakorinte 13), ga re tsebe Modimo (1 Johanese 4:8) gomme Modimo ga a ka gare ga rena (1 Johanese 4:12). Modumedi yo mongwe le yo mongwe a ka ba le nnete ya gore lerato la Modimo le tšhetšwe ka dipelong tša rena ka Moya wo Mokgethwa wo re o filwego (Baroma 5:5). Ge e le gabotse re na le boikarabelo bja go bjala “peu” yeo, gomme tsela e tee ye re kago dira bjalo ke go rapela gore lerato la lena le gole le eya le na le tsebo le kwešišo ye e feletšego, gore le kgone go kgetha se sebotse (Bafilipi 1:9). Ke ka lebaka la eng kgetho ye e le bohlokwa? E bohlokwa gore ke mo le tlago ba ba ba hlwekilego ba go hloka bosodi ka letšatši le Kriste a tla bego a etla ka lona (Bafilipi 1:10).

Thapelo e na le maatla kudu le bokgoni bja go fetoša maemo a rena le ka tsela ye re bonago bophelo ka yona, ka gobane Modimo o kwa thapelo ye nngwe le ye nngwe. Ka mantšu a RA Torrey: “Thapelo ke senotlelo se se bulago mengwako ka moka ya polokelo ya maatla le kgaugelo e kgolo kudu ya Modimo. Tšeo ka moka Modimo e lego yena, le tšeo ka moka Modimo a nago le tšona, di ka go thuša ka thapelo.”