Mo tumiše – Letšatši la 23

Go baleng ga rena ga nako ya go feta ga letšatši le letšatši re boletše ka thapelo ye e lego mogala wo o re kgokaganyago le Modimo. Thapelo gape ke go dumela ka kgonthe ka go se be le bokgoni ga rena go ka iphetoša, eupša sammaletee gape ke tsebatšo ya go ithekga ga rena go bokgoni bja Modimo ge re kgopela: “Morena, mphe …”

Dafida o a hlophega diatleng tša batho ba ba mo swerego gampe, ba mo hlasela le go nyaka go mmolaya, gomme ke ka lebaka leo a thomago thapelo ya gagwe go Pesalome 86 ka mantšu: “Morena, ntlhwaele tsebe o nkarabe, gobane ke mohlaki ebile ke mohloki.” Go dikgopelo tše di latelago, go molaleng gore o hloka tšhireletšo, phološo, kgaugelo, tebalelo le lethabo la Modimo bophelong bja gagwe (Pesalome 86:1-5). Ka gare ga maemo a a kgateletšego, ga a dikadike go opela ka maatla le bogolo bja Modimo gomme se se mo tutuetša go fihla boemong bjo a rapelago: “Retologela go nna o nkgaugele, o ntiiše, nna, mohlanka wa gago; o mphološe … Mpontšhe sešupo sa botho bja gago” (Pesalome 86:16-17). Ge e le gabotse o kgopela sešupo go Modimo, mohlolo bophelong bja gagwe o o tlago homotša manaba a gagwe ge ba bona se Modimo a direlago bana ba gagwe. O nyaka gore Modimo a mo diriše bjalo ka mohlala.

Go bile le motho yo mongwe yo a dirilego kgopelo ye e swanago. Lesogana la makoko la kgopela gore tatago lona a le fe kabelo ya lona pele ga nako. Gomme a tšitlanya kabelo ka moka gomme a šala a se na tšhelete le go ba kgakanegong. Ka go lemoga kudu sebe sa gagwe kgahlanong le tatagwe le legodimo, a tšea sepheto sa go boela go tatagwe, a re: “Hle, ntshware bjalo ka yo mongwe wa bathwalwa ba gago” (Lukase 15:19).

Ka dinako tše dingwe, bjalo ka tabeng ya Dafida, batho ba bangwe ke sebaki sa mathata a rena. Gantši, bjalo ka morwa yo a tšitlantšego lefa la gagwe, ke dikgetho tša rena tše mpe le diphošo tše di re arošago. Bobedi bja bona, lega go le bjalo, ba rapetše ka maikemišetšo a kgonthe le pelo ye e nyamilego, gomme dithapelo tša bona ka bobedi tša arabja. Semaka sa dikanegelo tše tše pedi ke gore tate yo a ratago o be a ikemišeditše le go leta go amogela ngwana wa gagwe ka diatla tše bulegilego le ka tšhegofatšo.

Tatago le yena o go letile.