Mo tumiše – Letšatši la 20

Ge o ka bolela le motho ka leleme la gagwe, o ba kgauswi le motho yoo. Ka bomadimabe, go na le selo se tee sa gore – ge se se gona – se tla šitiša poledišano e kaone gomme seo ke leleme la pelo: lerato. Le ge motho a ka bolela maleme ka moka a batho le gaešita a barongwa eupša a se na lerato, mantšu a gagwe a bohlale a ka se tšeelwe hlogong. Go yo a a kwago, ke mantšu fela, medumo ye e tla tšewago ke moya. 1 Bakorinte 13:1 e hlaloša motho yo a se nago lerato bjalo ka “tshipi ye e kwetenyago goba moropa wo o tidimetšago”.

Ge motho a nagana gore o bohlokwa kudu gomme o swanetše go hlomphiwa ka gobane o na le neo ya boprofeta, eupša ga a na lerato, ka gona o swanetše a dumele gore “ga ke selo” (1 Bakorinte 13:2). Ela hloko gore ga se mantšu goba tlhalošo ya wona ao e sego selo, eupša seboledi. Badumedi, ka gona, ba na le boikarabelo bja go ka ba le lerato le tletšego la Modimo ge ba nyaka go ba khuetšo e kaone maphelong a ba bangwe, go sego bjalo ba swanetše ba dumele gore: “ga ke selo”.

Go utolla diphiri le go ba setsebi se se nago le tsebo e ntši le go ba le tumelo e ntši mo motho a kago šutiša dithaba go ka ba bohlokwa ge motho gape a na le lerato le go le abana le ba bangwe. Ka ntle le lerato dilo ka moka ga di re gore selo, gomme motho a ka no dumela gore: “ga ke selo!”

Go neela ka dithoto goba go dira ka mo o ka kgonago go thuša motho, gantši go baka gore moamogedi a hlomphe monei kudu. Ke gabotse, eupša monei ka mehla o swanetše go itlhahloba le go ipotšiša ge e ba ditiro tša gagwe tše botse ka nnete di hlohleletšwa ke lerato la gagwe go ba bangwe. Ge e ba ga go bjalo, o swanetše go tseba gore: “ga ke hwetše selo”.

Go 1 Bakorinte 13:1-3, mongwadi o bolela ka karolo ye nngwe le ye nngwe ya go phela ga batho. Molomo wa gagwe (maleme), bohlale bja gagwe (tsebo, diphiri), moya (tumelo, seprofeto), mmele le dithoto. Ka ntle le go pepetletša o tsebatša mo gore karolo ye nngwe le ye nngwe ya bophelo bja motho e bopa boyena ka moka gomme ga go karolo ye e kago šoma ka ntle le lerato la Modimo ka gare ga bophelo bja motho.

Ke ka lebaka la eng go gatelelwa lerato? Mmopi wa rena ke lerato, karolo ye nngwe le ye nngwe ya gagwe ke lerato, gomme bohle bao ba tshephetšego go yena gore ba phele, ba phediša ke lerato la gagwe. Batho ba ba hlodilwego ka seswantšho sa gagwe ba ka leka bjang go dira se sengwe ka ntle le dineo tša gagwe? Lerato ke maatla a a neago bophelo, gomme nna le wena re baswari ba lona.