Mo tumiše – Letšatši la 19

Batho ba mmalwa lefaseng ka sephiring ga ba rate tumo ya go ka tsebega kudu goba go tuma ka letšatši le lengwe. Mohlomongwe e mabapi le leeto la go ka lemogwa, goba tumo ya go tlogela se sengwe go netefatša gore motho ga a lebalwe. Go sa šetšwe seo se ka diregago, batho ba bantši ba nyaka selo se tee seo se holofetšago katlego le lethabo bophelong bjo.

Go be go na le monna yo a bego a na le tšohle go ka gopolwa go ya go ile. O be a lokile, e le motho wa go obamela molao, a hlompha melao ya sedumedi, a hlompha batswadi ba gagwe gomme a humile, mohlomongwe ka gobane e be e le rakgwebo yo a atlegilego. Go sa šetšwe bohlatse bjo ka yena, o be a ikwa gore go na le selo se se hlaelago – kgonthišetšo ya bophelo bjo bo sa felego. Ge a botšiša Jesu ka se, a hwetša tiišitšo ya se a bego a šetše a se tseba: “O sa hlaelelwa ke se sengwe.” Gomme gwa latela karabo ya go nyamiša le go phafoša: “Sepela o yo rekiša tšohle tše o nago le tšona, o tšee tšhelete ya gona o e fe badiidi, mme o tla ba le lehumo legodimong. Ka morago ga moo o tle o ntatele” (Markose 10:21).

O a bona, kgopolo ya gagwe ya se se bego se le bohlokwa go netefatša lefelo la gagwe le bohlokwa, la go ya go ile, e be e theilwe go diphihlelelo tša gagwe le mabokgoni. E be e le mešomo e mebotse ye e swanelago ke moputso o mokaone. Gomme Jesu a tla a hlakahlakanya lefase la gagwe – mediro ye mebotse e feta go obamela melao ya boitshwaro le ya motheo. E sepedišana le ditswalano mo o ineelago le go neela ka dithoto tša gago ka lebaka la lerato gomme e se gore o nyaka go boela ke se sengwe.

Go kgomarela dithoto tša lefase, setloša-bodutu, mošomo, maemo setšhabeng, mošomo o boima goba dilo tša go swana tše di onalago, ga go fe kholofelo goba tetelo ya bophelo bjo bo sa felego, ka gobane ga di galagatše pelo ya tlhago ya Modimo – lerato. Jesu o leka go hlagiša nnete ye ka go bolela ditswalano tše pedi ka karabo ya gagwe go monna wa mohumi yo a obamelago molao. Sa pele, rekiša dithoto tša gago tše ntši tše di lego bohlokwa go wena gomme o nee badiidi tšhelete. Se e tla ba teko e kgolo ya lerato la monna yoo go batho bagabo, yeo e mo palelago kudu. Sa bobedi, tlogela maemo a gago, ineele go nna, Jesu, gomme o be molatedi wa ka. Lerato la gagwe le le lego mo go sa swanelago le mo thibela go dira bjalo. Ke masetlapelo!

Ga go se re ka se dirago lefaseng se e lego se segolo, se bohlokwa kudu goba go ba le maemo go feta molao o le tee wo Tatewešo a re filego wona, e lego, go mo rata godimo ga dilo ka moka, le go rata batho ba bangwe bjalo ka ge re ithata. Lerato le le neelago le go hlankela ke karabo go tše kgolo.