Mo tumiše – Letšatši la 18

Pelo ya motho ke mothopo wa go phela ga gagwe – se a lego sona, ka fao a naganago ka gona, se a se bolelago, ka moka di tšwa pelong ya gagwe. Ke ka lebaka le puku ya Diema e bolelago gore: “Se bohlokwa go feta tšohle ke go itota go tše o di naganago, gobane ke tšona di laolago bophelo bja gago” (Diema 4:23).

Gomme ge Paulose a boledišana le Bakorinte ka go ja selalelo, ga go makatše gore ntlha ya gagwe ya pele ya tšhupetšo e mabapi le boemo bja pelo tša bona. O a tseba gore pelo e radia go feta tšohle (Jeremia 17:9) le gore “Ba khutlogile mahlo ka go nona, ba dula ba bolela ka dipelo” (Pesalome 73:7).

Go ba thibela go ja senkgwa le go nwa go tšwa go komiki ya Morena ba sa swanela, Paulose o botšiša babadi ba gagwe go hlahloba dipelo tša bona ka mo go feletšego, gore ba se dire sebe kgahlanong le mmele le madi a Morena.

Re swanetše go lebelela eng ge re hlahloba dipelo tša rena? Sa pele, e ba le nnete ya gore o naganne ka le go kwešiša gabotse se senkgwa le madi di se hlalošago. Senkgwa ke segopotšo sa sehlabelo sa mmele wa Kriste gomme beine ya madi a gagwe ao a tšholotšwego sefapanong, go boelanya tswalano ya rena le Modimo. Potšišo ye o swanetšego go ipotšiša yona ke gore: Ekaba ke amogetše mpho ya tswalano ye e tsošolotšwego le bophelo bjo boswa?

Sa bobedi, ekaba tsela ye ke phelago ka yona e hlatsetša go tswalano ye e tsošolotšwego le bophelo le Modimo? Pele o ka araba ka “ee”, bala se pele: Ekaba o rata Modimo kudukudu – ka pelo ya gago ka moka, moya, maatla le kgopolo – le moagišani wa gago bjalo ka wena? Wo ke wona molao wo o akaretšago melao ka moka!

Ke karolong ya mafelelo ya molao mo gantši re dikadikago – ga re rate batho bjalo ka ge re ithata. Re katana le go lebalela batho, go bea dikgahlego tša bona pele ga tša rena, go rarolla diphapano ka go hloka boithati. Ge re sa ikemišetša go itlhahloba le go dumelela Lentšu le Moya wo Mokgethwa go tliša pepeneneng dilo tše di sa swanelago go ba karolo ya maphelo a rena, re ba kotsing ya go kgatha tema selalelong re sa swanela – ka dipoelo tše di kwešago pelo bohloko. Tharollo? Hlahloba pelo ya gago gomme o ntšhe dilo tše di sa nyakegego!