Mo tumiše – Letšatši la 17

Go dingwalo, bokgabo, bophelo bja letšatši le letšatši, seetša le leswiswi gantši di tšweletšwa bjalo ka maganetši. O ka akanya ka ge o notleletšwe ka gare ga kgolego ya ka tlase ga mobu bophelo bja gago ka moka gomme o sa bone seetša? Seo se boifiša kudu! Seo se baka kgateletšego! Go ahlolelwa lehu la bophelo ka moka ka ntle le parola. Ga se thato ya Modimo ya motho ofe goba ofe! O nyaka gore kgolego e bulwe gore seetša se tsene se tloše leswiswi.

Ga go makatše ka Bibeleng ka moka re ithuta ka seabe se seetša – Jesu Kriste – se swanetšego go ba le sona maphelong a rena. Bjalo ka modumedi go Kriste, o ngwana wa seetša gomme seo se nyaka gore tsela ya gago ya go phela e tiišetše tumelo ya gago ye o e bolelago. E swanetše e be e mpsha, e fapanego, ka ntle le go latiša leswiswi le o sa lego wa phela go lona. Yeo ke thato ya Modimo ya bophelo bjo bongwe le bjo bongwe bja modumedi.

Go lemoga seo maphelong a rena se swanetšego go fedišwa ke seetša, re swanetše go: “Lekang go ithuta tše di kgahlago Morena” (Baefeso 5:10). Go hwetša seo, re hloka go itlhahloba, re dumelela nnete go kganya dipelong tša rena le go utolla leswiswi. Gomme re swanetše re ikemišetše, go sa šetšwe gore ga se selo se bonolo go rena, go dumelela seetša go raka leswiswi, ka gobane tumo ya Modimo go nna le wena, ke gore re phele seetšeng.

Paulose o a re thuša go Baroma 12:1-2 go tseba se thato ya Modimo e lego sona ge a re kgopela gore: Ineeleng go yena le be sehlabelo se se phelago, se sekgethwa se se mo kgahlago. Ke wona mokgwa wa nnete wo le swanetšego go mo khunamela ka wona. Se se hlalošwago fa ke gore wena, le boikgantšho bja gago, o swanetše go hwa. Ke lehu le boima, eupša la go ba le kholofelo, ka gobane matsogong a Modimo, o a phela, wa ba yo mokgethwa le go amogelega go yena, gomme sammaletee o hlankele ba bangwe.

Le se swantšhe mekgwa ya lena le ya batho ba mo lefaseng, le upše le dumelele Modimo gore a le fetoše ka go le mpshafatša dikgopolong.

Nagana ka tsela e mpsha, e fapanego, le ka ditsela tše fapanego. Go se, o hloka thušo – dumelela Lentšu le tsene pelong ya gago le mpshafatše kgopolo ya gago (Jakobose 1:21).

Gomme dipoelo? Seetša se se go thušago go fapantšha thato ya Modimo – dilo tše di lokilego, di amogelegago le tše phethagetšego.