Mo tumiše – Letšatši la 12

Go batho ba bantši kgopolo ya go kgopela yo mongwe keletšo ga e amogelege. E tla ba e le go amogela bofokodi, go hloka tsebo le go ithekga ka ba bangwe. Lega go le bjalo, ditemošo tša batho ba bangwe gantši di tliša pono e mpsha ka gobane tsebo ya bona le boitemogelo di tšwelela le go bonwa ka mo go fapanego. Diema 11:14 e tiišetša bohlale bja baeletši: “Tšhaba sa go hloka ketapele se a thubega; baeletši ba bantši ba a se lotola.”

Boitemogelo bo re ruta gore re se amogele keletšo ka ntle le kelohloko go tšwa go batho, ka gobane batho ba ka dira diphošo gomme gantši ga ba tsebe leano la Modimo ka bophelo bja gago. Ka gona, pele o ka nyaka keletšo go batho, netefatša gore sa pele o nyaka tlhahlo go Yo a laolago bophelo bja gago.

Joshua 8 – 9 e hlaloša temana ya histori bophelong bja Israele ye e bontšhago ka fao go holago ka gona go bolela le Modimo pele o ka bolela le ba bangwe, gape le ka fao go lego kotsi ka gona go se bolele le Modimo.

Israele e thopile Jeriko ka tsela ya mohlolo ka gobane ba phethagaditše leano le Modimo a ba filego lona ka mo go feletšego. Moragonyana ga fao, gwa latela Ai gomme go ya le ka pego ya dihlodi mabapi le Ai, Joshua le banna ba gagwe ba tšea sepheto sa go romela banna ba dikete tše tharo ntweng. Phošo! Ba fentšwe gomme ka poifo le dihlong ba tšhabela lenaba.

Se ba ithutilego sona? O ka se ithekge ka diphenyo tša go feta go ka šogana le ntwa e mpsha goba taba. Hwetša taelo go Modimo ya letšatši le lengwe le le lengwe le tumelelano ye nngwe le ye nngwe e mpsha; ka gobane o ka no se tsebe ka mehla ge e ba go ka ba go bile le go fapoga go leano la katlego ya gago ya go feta. Ka morago, Joshua o kgopela keletšo ya Modimo gomme o hwetša gore Akane o tshetše taelo ya Modimo – o tšere se e bego e se sa gagwe. Ba mo otlile gatee, ba ka fenya Ai le go thopa motse?

Katlego ya diphenyo tša Israele e tšhošitše badudi ba Kanana gomme ge batho ba tšhogile, ba a tšhaba goba ba loga maano a bofora, bjalo ka ge Bahibe ba Gibeone ba dirile. Ba apara diaparo tša go gakantšha bjalo ka baemedi ba naga ya kgole ka diaparo tša mankgeretla, dijo tša kgale le makuka a a kgeigilego go kgodiša Joshua go dira kwano ya khutšo le bona. Ba be ba le bohlale mo ba ba bilego ba bolela ka Modimo yo ka mohlolo a ntšhitšego Israele Egepeta. Banna ba Israele ba kgolwa se ba bego ba se bolela. Ka lebaka la eng? “… [ba] se ke ba botšiša Morena ka taba yeo” (Joshua 9:14).

Nna le wena re ka se kgone go se kgopele Modimo keletšo mabapi le se sengwe le se sengwe se se re hlagelago. Ke ka tlhahlo ya Moya wa gagwe fela mo re kago tseba boradia, maaka, bohwirihwiri le bofora.